Publikohet video e dhunës ndaj deputetit Strazimiri (VIDEO)
Pëlqej
Pasi Prokuroria ka ngritur akuzë ndaj deputetëve të PS-së Arben Ndoka dhe Pjerin Ndreu, për goditjen e deputetit të PD-së Gent Strazimiri, del në dritë edhe videoja ku deputeti goditet në ambientet e Kuvendit.

Në videon e publikuar, shfaqen deputetët e majtë njëri pas tjetrit teksa godasin deputetin Strazimiri në korridorin e Kuvendit. I pari qëllon ndaj deputetit të PD-së Gent Strazimiri, deputeti i PS-së. Arben Ndoka e ka goditur atë në pjesën e fytyrës.

Në këto momente Strazimiri ka qënë duke u marrë me telefonin dhe goditja i ka ardhur e befasishme. Fillimisht Ndoka e ka prekur nga xhaketa e më pas e ka goditur me grushta.

Teksa Ndoka largohet, Strazimiri e ndjek nga pas, por një grup deputetësh në korridor e ndalojnë. Në këto momente, kur Strazimiri ndodhej me kurriz, vjen goditja e dytë, këtë here nga deputeti tjetër i PS-së Pjerin Ndreu.

Videoja është regjistruar më 10 korrik të 2014 atëherë kur ndodhi edhe ngjarja. Pas ngjarjes opozita bojkotoi Kuvendin.

Edhe në akuzën e Prokurorisë, thuhet se agresioni u dëshmua dhe nga pamjet filmike te siguruara nga kamerat e sigurisë në Parlament.

Prokuroria e Përgjithshme bëri me dije se "hetimi për deputetët Ndoka dhe Ndreu nisi pas kallëzimit të bërë më 14 korrik, nga Edi Paloka si kryetar i grupit parlamentar të Partisë Demokratike. Zëdhënësja e Prokurorisë deklaroi se Ndoka e Ndreu kanë goditur për shkak të detyrës kolegun e tyre Strazimiri, ku gjatë veprimeve të nevojshme proceduriale, janë sekuestruar kamerat e sigurisë, ku evidentohet goditja e deputetëve socialistë ndaj deputetit demokrat. Sipas pamjeve filmike ka qenë Ndoka ai që e ka goditur i pari me grusht Strazimirin dhe pak më pas edhe Ndreu".

Në qëndrimin e Prokurorisë së Përgjithshme thuhet se "deputeti Strazimiri është goditur për shkak të deklaratave politike në 10 korrik 2014, duke bërë që Ndoka dhe Ndreu, të merren të pandehur nën akuzën e goditjes për shkak të detyrës".
Shtuar më 23/09/2014, ora 20:42
Shkruani komentin tuaj!
Të fundit nga kjo kategori