PSEUDONIMET/ Kush janë zyrtarët spiunë që u larguan pas zbulimit të dosjeve?
Viron Bezhani
Viron Bezhani është djali i Nazif Bezhanit, i cili ka qenë kryetar i Komisionit të Verifikimit të Zyrtarëve të Lartë për bashkëpunimin me sigurimin famëkeq të shtetit gjatë periudhës së diktaturës. Komisioni ka funksionuar gjatë periudhës 1995-2004 duke verifikuar qindra dosje raporton portal Albeu.

Në një intervistë për gazetën “Sot”, Viron Bezhani ka shpjeguar se gjatë funksionimit të këtij komisioni, në rrjetën e tij kanë rënë një serë zyrtarësh të lartë, madje edhe ambasadorë që kanë qenë bashkëpunëtorë të sigurimit të shtetit. Pas konstatimit se kanë qenë bashkëpunëtorë të sigurimit, një pjesë e tyre janë larguar më pas nga puna.

“Mund të përmendim dikasteret si Ministria e Tregtisë, ku kishte persona me pseudonim “këshilltari” apo “gjurmuesi” në funksione të larta që u larguan nga puna vetëm pas verifikimit, ose nga pushteti lokal që u larguan nga funksionet e tyre plot 7 veta nga një listë prej 11 vetash, pasi ishin aktivistë të rregullt në organet e sigurimit dhe kishin pseudonimet e tyre si “Vullnetari” “Besimtari” “Pisha”.., etj, ose një ambasador me pseudonimin “Fenomeni”, i cili ka qenë agjent i Sigurimit të Shtetit”, - thotë ai.

Diskutimi mbi dosjet e sigurimit dhe bashkëpunëtorët e tij është ende i nxehtë në vend dhe bëhet shpesh pjesë e debatit të politikës, për shkak se një pjesë e bashkëpunëtorëve të atëhershëm gëzojnë ende edhe sot benefite nga shoqëria dhe shteti shqiptar./albeu.com/
Shtuar më 17/07/2015, ora 14:36
Shkruani komentin tuaj!
Të fundit nga kjo kategori