PS e vendosur, heqja e imunitetit pas ndryshimeve kushtetuese
Partia Socialiste ka ripërsëritur qëndrimin e saj sot se nuk do ta votojë ligjin pa u miratuar më parë nisma e saj për ndryshimet kushtetuese. Në një konferencë për shtyp, sekretari për çështjet ligjore Fatmir Xhafa theksoi se PS i ka paraqitur Kuvendit një paketë me amendamente.



“Edhe për imunitetin ne nuk kemi asnjë dilemë, vota jonë është pro, të tjerat janë alibi e marrëzi politike e kushtetuese. Mjaft që në tre javë të kryhen propozimet për ndryshimet kushtetuese, e pastaj le të votojmë, një dhe vetëm një projektligj për ndryshimet kushtetuese. Ne i kemi paraqitur Kuvendit paketë me amendamente, kemi propozuar që gjyqtarët e Kushtetueses dhe të Gjykatës së Lartë të zgjidhen me 3/5 për të shpëtuar kontrollin politik mbi gjyqësorin. Kemi propozuar që Rregullorja e Kuvendit të votohet me shumicë të cilësuar. Amendamentet dobësojnë pushtetin e pakufizuar të individit dhe i japin pushtet real e të vërtetë shumicës. Të bëjmë ndryshimet kushtetutese dhe më pas le ta votojmë” ka theksuar Xhafa.

Xhafa, i ka bërë gjithashtu apel mazhorancës të reflektojë për paketën e opozitës dhe të japë votën e saj për to.

“Kush do drejtësinë e pavarur, gjyqtarët e paanshëm le t`i votojë amendamentet kushtetuese të propozuara nga ne. Kush do barazim para ligjit le të votojë amendamentin tonë kushtetues. Kush do t`i japë fund praktikës të shëmtuar të shit-blerjes së gjyqtarëve le të votojë amendament tona kushtetuese. Vota ndaj amendamenteve të PS për ndryshimet kushtetuese është votë për barazinë para ligjit, për drejtësi të pavarur, eficente dhe transparente. Ne shpresojmë që ata të reflektojnë dhe të votojnë amendamentet tona dhe ti bashkohen nismë sonë” tha Xhafa. /albeu.com/

Shtuar më 31/08/2012, ora 13:22

Shkruani komentin tuaj!
Të fundit nga kjo kategori