Presidenti i zgjedhur Joe Biden mbajti një fjalim dhe i bëri thirrje Presidentit Donald Trump të dalë në televizionin kombëtar dhe të mbrojë Kushtetutën, të bëjë thirrje që njerëzit të largohen nga Kapitoli.

Ai e quajti ngjarjen e së mërkurës një moment të errët në historinë e vendit, një sulm ndaj Republikës dhe ndaj sundimit të ligjit.

Zoti Biden tha se skenat e kaosit në Kapitol nuk pasqyrojnë Amerikën e vërtetë, nuk pasqyrojnë “atë që ne jemi”.

Zoti Biden duhet të fliste për ekonominë, por ai e ndryshoi temën e fjalimit për shkak të zhvillimeve në kryeqytetin amerikan.

Presidenti i zgjedhur Joe Biden iu drejtua protestuesve pro-Trump që ndodhen tani në Kapitol, duke thënë se puna e katër viteve të ardhshme do të jetë rindërtimi i demokracisë.

“Puna e momentit dhe puna e katër viteve të ardhshme duhet të jetë rivendosja e demokracisë – e mirësjelljes, nderit, respektit, sundimit të ligjit. Vetëm një mirësjellje e thjeshtë, e thjeshtë,” tha Biden.