Prokuroria nis hetimet për pasurinë e Prudentinos
Prokuroria e Përgjithshme, Tiranë
Prokuroria e Përgjithshme tashmë e ka fokusuar hetimin e saj për anëtarin e "Sacra Corona Unitta" Albino Prudentino në pasurinë që ai ka në Shqipëri. Ligji "Antimafia" përcakton shprehimisht se prokuroria, me të marrë një indicie për aktivitetin e subjektit, kryen sekuestrimin e pronave të tij. Për këtë gjë prokuroria nuk ka nevojë që të ketë një procedim penal por thjesht ka nevojë që të marrë informacion.

"Prokuroria dhe policia gjyqësore marrin dijeni për pasuritë që duhen verifikuar, sipas këtij ligji, me iniciativën e vet ose me njoftim të bërë nga të tretët",-thuhet në nenin tetë të ligjit. Në rastin konkret, prokuroria ka marrë dijeni përmes dosjes së ardhur nga Italia dhe nëpërmjet të tretëve që janë mediat.

Kështu që tashmë organi i akuzës ka fokusuar hetimin në këtë drejtim duke verifikuar të gjitha pasuritë në emrë të Prudentinos, pasi ato dyshohen se janë frut i aktiviteteve kriminale të anëtarit të "Sacra Corona Unita".

Burime nga Prokuroria e Përgjithshme pohuan se në dosjen e ardhur nga Italia për Albino Prudentinon ndodhet edhe kërkesa për verifikimin dhe bllokimin e pasurive të tij.

"Këtë kërkesë ne e kemi përcjellë në prokurorinë e Vlorës, pasi ajo ka nisur fillimisht hetimin për të. Duke qenë se ai ka jetuar në Vlorë, bizneset e tij e kanë pikënisjen në këtë qytet dhe arrestimi është kryer po aty, çështja po shqyrtohet nga Vlora", pohojnë burimet nga akuza.

Ndërsa për pronat kryesore të familjes Prudentino të cilat ndodhen në kryeqytet ende nuk ka nisur asnjë proces verifikimi.
Shtuar më 04/10/2010, ora 10:46

Shkruani komentin tuaj!
Të fundit nga kjo kategori