Programi i qeverisë, Selami: S'pasqyron premtimet
Deputeti demokrat Eduard Selami akuzoi mazhorancën se nuk ka pasqyruar në programin qeverisës shumë nga premtimet e bëra gjatë fushatës elektorale. Sipas Selamit, qeveria e re është zgjedhur duke nënvlerësuar eksperiencën, ndërsa e cilësoi si një shqetësim serioz faktin që ky kabinet është rritur sipas tij, me 30%.

"Është pozitiv fakti që marrin pjesë mjaft gra në qeverinë e re, kjo është një arritje faleminderit. Edhe mosha e re është hap pozitiv, por kjo është bërë në mënyrë të panevojshme duke nënvlerësuar eksperiencën. Shqetësimi im serioz lidhet me masën e rritjes së qeverisë mbi 30%. Kjo është një rritje shumë e lartë", deklaroi Selami.

Më parë, ish-ministri i Bujqësisë Genc Ruli ishte deputeti i parë që nisi diskutimet në seancën e sotme, e cila nisi rreth orës 09:20. Deputeti demokrat e cilësoi programin qeverisës si një manifest që nuk njeh realitetin. Sipas Rulit, "për të realizuar një pjesë të programit do të duheshin 24 vjet jo katër. Në asnjë pjesë të programit nuk gjen ndonjë argument konkret, se ku dhe si do te gjenden fondet ekstralarge për të realizuar ato që premtohen". /albeu.com/
Shtuar më 15/09/2013, ora 11:39
Shkruani komentin tuaj!
Të fundit nga kjo kategori