"Porositësi i 137 kg kokainë", Gentian Malindi merret i pandehur nga SPAK
Struktura e Posaçme kundër Korrupsionit dhe Krimit të Organizuar (SPAK) ka marrë zyrtarisht si të pandehur Gentian Malindin si porositës të sasisë prej 137 kg kokainë që pritej të mbërrinte vitin e kaluar në Portin e Durrësit.

Kujtojmë se kokaina ishte fshehur në katër konteinerë të mbushur me banane që vinin nga Ekuadori drejt Shqipërisë. Porositësit e drogës, të pikasur nga DEA amerikane, kishin shfrytëzuar itinerarin e importit të frutave ekzotike për të transportuar brenda konteinerëve edhe “dërgesën” e tyre.

Me autorizimin e DEA-s amerikane, kur konteinerët mbërritën në portin e Pireut në Greqi u krye edhe zëvendësimi i kokainës me oriz. Kështu autoritetet ishin një hap para trafikantëve. Në Shqipëri diçka mesa duket nuk shkoi siç duhej, dhe personi i dyshuar si porositësi Gentian Malindi, arriti të arratisej pasi hapi një prej pakove dhe pa se aty nuk kishte kokainë por oriz.

Të arrestuar për këtë ngjarje janë Altin Myslihaka peshkatar dhe Ardian Bega, punonjës sigurie në Port ndërsa Gentian Malindi vijon të jetë në kërkim.

Ardian Bega pohoi para oficerëve se ishte kontaktuar nga Gentian Malindi që të merrte diçka në konteinerët me banane, brenda të cilave kishte 137 kg kokainë. Po sipas Begës, pasi Malindi kishte pikasur se ishte në vëzhgim nga policia, e kishte hedhur drogën nga makina në zonën e Shkëmbit të Kavajës.
Shtuar më 27/11/2020, ora 13:59

Shkruani komentin tuaj!
Të fundit nga kjo kategori