Ministri i Jashtëm polak, Radostav Sikorski zhvilloi një vizitë zyrtare në Tiranë, ku pati dhe një takim me homologun e tij Haxhinasto. Vetëm pak kohë pas marrjes së presidencës të Bashkimit Europian, Polonia do të mbështesë fuqishëm integrimin e Shqipërisë.

Sikorski u shpreh për mediat në lidhje me procesin zgjedhor se deri më tani janë plotësuar kushtet, ndërsa ende nuk ka pasur ankesa nga vëzhguesit ndërkombëtarë të zgjedhjeve.

“Ajo që mund të them nga vëzhgimi i këtyre zgjedhjeve është se metodat janë korrekte, transparente dhe nuk kemi parë vërejtje. Gëzohem shumë kur mësoj se ODHIR deri më tani nuk ka vërejtje për procesin zgjedhor”, tha Sikorski.

“Kur Shqipëria do të marrë statusin e vendit kandidat, atëherë 3 javë më vonë do të bëhet anëtare e Bashkimit Europian, por sikundër ju e dini, këto procese nuk lidhen me data konkrete por me plotësimin e kushteve. Në momentin që Shqipëria do t’i plotësojë ato, atëherë nuk do të ketë asnjë vonesë. Këtë e them me plot bindje”, tha ai.

Ministri i Punëve të Jashtme të Polonisë pati takime zyrtare dhe me kreun e shtetit, Bamir Topi si dhe me kryeministrin Berisha. /albeu.com/