Politika, mesazhe ngushëllimi për Teodor Laçon
Presidenti Nishani, sikundër edhe kreu i PD, Lulzim Basha, përmes një deklarate për mediat kanë shprehur ngushëllimet për ndarjen nga jeta të shkrimtarit, kineastit, publicistit dhe intelektualit të spikatur Teodor Laço.

Nishani shkruan se përveç përvijimit të një profili modern në krijimtarinë letrare, Teodor Laço nuk u tregua indiferent edhe ndaj zhvillimeve demokratike, duke u kthyer në një nga zërat kryesore në jetën parlamentare shqiptare.

"Presidenti i Republikës, Sh.T.Z. Bujar Nishani shpreh ngushëllimet më të ndiera e të sinqerta personale dhe institucionale për ndarjen nga jeta të shkrimtarit, kineastit, publicistit dhe intelektualit të spikatur Teodor Laço:

“Me dhimbje të thellë mësova për ndarjen nga jeta të intelektualit të nderuar Teodor Laço, një prej shkrimtarëve më të shquar dhe përfaqësues të letërsisë bashkëkohore shqiptare, që përveç përvijimit të një profili modern në krijimtarinë letrare, nuk u tregua indiferent edhe ndaj zhvillimeve demokratike, duke u kthyer në një nga zërat kryesore në jetën parlamentare shqiptare.

Me përgjegjësinë e ngarkuar si ministër i Kulturës, Teodori shpalosi një tjetër përmasë të portretit të tij, duke ruajtur krejt infrastrukturën kulturore e duke zhvilluar politika të mirëfillta për trashëgiminë kulturore dhe artistike shqiptare si pjesë autentike e identitetit tonë kombëtar.

I përjetshëm qoftë kujtimi i Teodorit dhe shpirti i tij u prehtë në paqe!”, nënvizohet në mesazhin e Presidentit Nishani.

Ndërsa Basha duke shprehur ngushëllime për ndarjen nga jeta të Teodor Laços, shkruan se ai do të kujtohet mes të tjerash edhe si aktor i rendësishëm në përhapjen dhe konsolidimin e pluralitetit të mendimit në proceset demokratike.

"Me keqardhje mora lajmin e ndarjes nga jeta të shkrimtarit, publicistit, politikanit, diplomatit dhe kineastit të mirënjohur Teodor Laço!

Largimi fizik i njerezve me përmasa të tilla, shënon edhe fillimin e perjetësisë së tyre! Ai do te kujtohet si një faktor i rendësishëm në përhapjen dhe konsolidimin e pluralitetit të mendimit në proceset demokratike! Ngushëllime familjes, të afermëve dhe miqve të tij. U prehte ne paqe". /albeu.com/





Shtuar më 15/10/2016, ora 16:31
Shkruani komentin tuaj!
Të fundit nga kjo kategori