Policia e Fierit shpëtoi nga rrëmbimi një vajzë 9-vjeçare mbrëmjen e sotme në lagjen “Konferenca e Pezës”.

Ngjarja e rëndë është regjistruar pasditen e sotme në lagjen “Konferenca e Pezës” në Fier, ku 22-vjeçari e ka transportuar të miturën në lagjen “Liri”, ku ai banonte.

9-vjeçarja është parë rastësisht ndërsa qante mes pallateve, nga një efektiv policie, i cili ndodhej në një tjetër aksion për arrestimin e një grabitësi.

Mësohet se efektivi i policisë është përleshur me pengmarrësin, 22-vjeçarin Kristjan Binjaku, i cili është vënë në pranga pak minuta më vonë nga blutë e Fierit.

Fill më pas ka reaguar edhe Ministri i Brendshëm, Saimir Tahiri, ku njofton se e ka falenderuar përmes telefonit Inspektorin e Rendit te Drejtorise se Policise se Qarkut Fier, Z. Bledar Naci per kurajon dhe vendosmerine e treguar ne parandalimin e rrembimit te vajzes se mitur.

“Sapo pata kënaqësinë dhe nderin të telefonoja për ta falënderuar personalisht inspektorin e rendit të Drejtorisë së Policisë së qarkut Fier, z. Bledar Naçi për kurajën dhe vendosmërinë e treguar në parandalimin e rrëmbimit të një vajzë të mitur në qytetin e Fierit.

Nuk kam fjalë të përshkruaj shqetësimin e të ëmës së vajzës së vogël. Komunikova personalisht dhe ndjeva frikën e prindit, por edhe kërkesën për drejtësi në çdo fjalë të saj.

Fatmirësisht, një tragjedi u ndalua falë Bledarit. Faleminderit Bledar! Sot je shembull për të gjithë efektivët e Policisë së Shtetit. Djem si ti i bëjnë nder policisë dhe na japin shpresën se ky vend mund të bëhet vërtet vendi ku mbizotëron paqja, forca e ligjit dhe drejtësia. Krenar për ty dhe djemtë e Policisë së Shtetit!”, shkruan Tahiri në Facebook. /albeu.com/