Pilotë të dehur mbi qerre që fluturojnë! Zoti i ruajt shqiptarët në ajër
foto ilustruese
Indicenti i pak ditëve më parë me avionin e "Blue Panorama" që për pak i mori jetën 136 pasagjerëve duket të mos jetë një zhvillim rastësos në aviacionin civil shqiptar, i cili për fat të mirë nuk është përballur me tragjedi ajrore deri më tani, por rastet e mësipërme po ndodhin me një shpejtësi të llahtarshme.

Avioni i linjës Tiranë-Ankona u detyrua të kthehet në Rinas pak minuta pasi ishte ngritur në ajër për shkak të një tymi të dendur në kabinë.

Përmes një reagimi zyrtar Autoriteti i Aviacionit Civil tha se dyshonte se tymi, të cilin ata e quajtën avull, kishte dalë nga motorët pasi teknikët nuk kishin mundur të pastronin siç duhej solucionin me të cilin kishin larë motorët e avionit në mbrëmje.

Deri më tani nuk ka asnjë shpjegim zyrtar nga kompania se çfarë ka ndodhur, ndërsa Autoriteteti i Aviacionit Civil mbrohet me faktin se "nuk ka çfarë t'i bëjë një kompanie të regjistruar në Itali".

Albeu.com shtroi disa pyetje publike disa ditë më parë në lidhje me pretendimet e AAC, të cilat nuk janë marrë ende përgjigje shterruese (lexo anash).

-Nuk dimë ende se çfarë masash janë marrë për teknikët që "harruan të thajnë solucionin tek motorët e avionit", i cili për pak shkaktoi tragjedinë.

-Gjithashtu nuk dimë se si ka mundësi që çështje të tilla sigurie i lihen në duar teknikëve të papërgjegjshëm që "harrojnë" të bëjnë gjëra elementare.

-Nuk dimë gjithashtu nëse ishte solucion larës, apo antifrizë, siç u pretendua më vonë.

Për fat të mirë në Shqipëri nuk kanë ndodhur tragjedi ajrore, megjithatë është frikësuese përsëritshmëria e incidenteve që po ndodhin gjatë muajve të fundit, ku spikat pikërisht kompania "Blue Panorama".

NGRITJA, KONSTATIMI I TYMIT DHE RIKTHIMI NE RINAS I AVIONIT TE BLUE PANORAMA TE DIELEN


Në janar të vitit 2018, avioni i linjës Tiranë-Milano u detyrua që të bënte ulje emergjente në Falconara pasi kishin konstatuar hapjen e një dritareje të avionit, e cila përbën një rrezik të madh për humbjen e presionit në kabinë në fluturimet në lartësi.

Në shtator 2018, punonjësit e aeroportit të Rinasit konstatuan një pilot të dehur të kompanisë "Blue Panorama" që po bëhej gati të nisej nga Tirana për në Bolonja. Policia bëri me dije se bëhej fjalë për 47 vjeçarin Emilio Leone me origjinë nga Spanja, i cili u kap pas matjeve me një nivel alkooli mbi normën e lejuar. Pilotit iu ndalua fluturimi.

Në tetor të vitit të shkuar pasagjerët e hipur në avionin e kompanisë "Albaëings" dolën të tmerruar nga kabina pasi ajo u mbush me tym. Në një shpjegim të mëvonshëm, kompania theksoi se tymi kishte ardhur për shkak të një frenimi të fortë kur avioni ishte ulur në Rinas.

Vetëm disa muaj më pas, pikërisht në korrik të vitit të shkuar, avioni i linjës Bolonja-Tiranë, i kompanisë "Blue Panorama" u detyrua që të bënte ulje emergjente teksa fluturonte mbi Dubrovnik.

Avioni bëri një kthesë të fortë djathtas duke u ulur në Pescara.

Në atë kohë, kompania tha se ulja emergjente ndodhi për shkak se një person ishte ndjerë keq në kabinë dhe ata i erdhën në ndihmë duke e dërguar në spital në Pescara.

Rasti më i fundit ishte pak ditë më parë, ku për rrethana ende të paqarta kabina u mbush me tym dhe 136 pasagjerët u tmerruan për vdekje duke detyruar pilotin ta ulë avionin në Rinas pak minuta pas nisjes.

Por, çështjet e sigurisë nuk janë i vetmi problem për fluturimet nga Tirana dhe anasjelltas.

Kostot stratosferike si edhe vonesat janë gjithashtu një shqetësim i madh për pasagjerët, të cilët edhe pse paguajnë çmime të kripura shpesh detyrohen të presin për orë të tëra deri sa kompanitë të gjejnë avion për t'i çuar në destinacion. /albeu.com/
Shtuar më 28/02/2019, ora 15:24
Shkruani komentin tuaj!
Të fundit nga kjo kategori