Analisti Eduard Zaloshnja përmes një shkrimi të publikuar në Respublica.al ka analizuar ndryshimet e fundit në qeveri nga ana e LSI-së.

Më poshtë ju ftojmë të lexoni analizën e Z. Zaloshnja:

Pavarësht nga fjalitë e mëdha me fjalën “integrim” në përbërje, që janë thënë e do të thuhen për lëvizjet e fundit ministrore të LSI-së, shkaku i tyre duhet të jetë politik. Pakëkush mund të bindet se kalimi i një studiuesi të gjuhëve të huaja (Haxhinasto) nga ministria e jashtme te e ekonomisë dhe zëvendësimi i tij nga një agronom (Panariti) do t’i japin një impuls të fortë integrimit tonë diplomatik dhe ekonomik në BE.

Por cilat janë llogaritë politike që e bënë Metën të kryente këtë rotacion të çuditshëm?

Përgjigjen mund ta gjejmë në dy votimet e kryera në Kuvend para zgjedhjes së Presidentit të Republikës. Nasip Naçi, Ministri i Ekonomisë, Tregëtisë dhe Energjitikës, ishte i vetmi deputet i LSI-së që u nda nga grupi i vet parlamentar në votimin për anëtarin e KLD-së dhe për ligjin mbi akcizat. Në ato dy votime, tre deputetët e tjerë të LSI-së nuk morën pjesë në votim, duke i bërë shantazh të hapur Berishës në pokerin mes këtij të fundit dhe Metës për kandidaturën e presidentit.

Dhe Nasip Naço presupozohej të ishte deputeti më i besuar i Metës, meqë i është bashkuar më herët LSI-së dhe është me origjinë po nga Skrapari. Ndërsa dy deputetët e tjerë, Vangjel Tavo dhe Lefter Koka, janë prurje të vona në LSI.

Me lëvizjet e fundit ministrore, duket se Meta dënoi “pabesinë” e Naços dhe shpërbleu “besnikërinë” e Tavos. Të parin e hoqi nga posti i ministrit të ekonomisë, të dytin e bëri ministër të shëndetësisë. Ndërsa Lefter Koka duket se nuk ka pretendime për më shumë se kryetar grupi parlamentar.