PD: Rama shpërbleu militantët e tij në KQZ
Pëlqej
Nëpërmjet deputetit të saj, Oerd Bylykbashi, PD ka akuzuar sot kryeministrin Rama se ka shpërblyer militantët e Partisë Socialiste në Komisionin Qëndror të Zgjedhjeve. Bylykbashi theksoi Muho, Biba dhe Shtylla u shpërblyer me poste të larta për bllokimin që I bën këtij institucioni.

“Ditët e fundit doli sheshit farsa e Partisë Socialiste për gjoja paanshmërinë dhe apolitizmin e anëtarëve të saj në KQZ. Këto ditë Edi Rama shpërbleu me poste të larta në administratë ish-anëtarët e tij në Komisionin Qëndror të Zgjedhjeve për bllokimin që ata i bënë Komisionit. Denar Biba dhe Albana Shtylla, me urdhër të Edi Ramës, bllokuan vendimmarrjen e KQZ-së, dhe me urdhër të tij braktisën detyrën në KQZ duke u dorëhequr në të njëjtën kohë. Këtë e bënë me pretendimin se ishin apolitikë.

Me këtë veprim militant të dënueshëm ligjërisht, ata shkatërruan për llogari të Partisë Socialiste shkallën e parë ankimore, KQZ-në, me qëllim e vetëm që të varrosnin provat e vjedhjes prej Partisë Socialiste të mijëra votave dhe të një mandati në Lezhë, si dhe shumë shkelje në zonat e tjera.Për këtë sjellje, këta anëtarë të KQZ-së meritonin ndëshkim sipas Kodit Zgjedhor.

Por Edi Rama po i shpërblen për punën prej militanti të zellshëm politik. Ashtu siç dhanë dorëheqjen njëkohësisht, po njëkohësisht Denar Biba u emërua Kryetar i Komisionit të Prokurimeve Publike, ndërsa Albana Shtylla u emërua Sekretare e Përgjithshme e Kuvendit. Po kështu, Ilirjan Muho u emërua Drejtor i Përgjithshëm i Hipotekave” tha Bylykbashi. Sipas tij, tashmë nuk ka më shqiptar që ta besojë farsën komiko-tragjike të pavarësisë dhe depolitizimit te KQZ-së, që luajtën në Prill 2013 këta militantë partiakë, sipas regjisë së Edi Ramës./albeu.com/
Shtuar më 06/10/2013, ora 13:49
Shkruani komentin tuaj!
Të fundit nga kjo kategori