Partia Demokratike akuzoi sot Kryeministrin Edi Rama se po u devijon premtimeve të bëra gjatë fushatës elektorale për shëndetësi falas. Duke iu referuar takimit që Rama pati me punonjësit e shëndetësisë, zëdhënësja e selisë blu, Laura Vorpsi tha se Rama nuk tha asgjë lidhur me taksën progresive që premtoi dhe shëndetësinë falas.


“Kush shkon në spital, e ka një hall. Edi Rama shkoi sot në spital, dhe halli i tij i madh është se ka premtuar shëndetësi falas për të gjithë, dhe sa më shumë kalojnë ditët, aq më shumë del në dritë ky mashtrim elektoral. Mashtrimin e Edi Ramës për shëndetësi falas, nuk ka mjek që ta kurojë. Z.Rama vazhdoi të denonconte sot punën që ka bërë në spitalet tona për vite me radhë aleati i tij kryesor që e ka drejtuar këtë sistem, pavarësisht arritjeve dhe reformave të bëra.Z.Rama nuk u tha asgjë mjekëve dhe infermierëve se kur do të zbatojë taksën e tij progresive që do t’i ndihmojë ata të kenë të paktën 40 mijë lekë më shumë të ardhura në muaj, sic ka premtuar publikisht.Z.Rama foli për shumë gjëra sot mes mjekëve dhe infermerëve, por nuk tha asgjë për tezën e tij për shendëtësi falas. Kryeministri i ka tashmë të gjithë mekanizmat dhe kompetencat për të realizuar premtimin e tij elektoral, dhe nuk mund të justifikohet me asgjë” tha ajo.


Sipas saj Rama ka dy personalitete, njëri që premton shëndetësi falas, dhe tjetri që nuk thotë asgjë për këtë tezë kur gjendet në spital. /albeu.com/