PD: Kerry vlerëson dekriminalizimin, Rama dërgon Ndokën të prezantojë Prefektin e Lezhës
Sekretari i Përgjithshëm i Partisë Demokratike, Arben Ristani, ka akuzuar kryeministrin Rama se po shpërfill mesazhin e sekretarit amerikan të Shtetit, John Kerry, lidhur me dekriminalizimin, duke vazhduar të përdorë elementë të inkriminuar në partinë e tij. Në deklaratën e radhës për mediat, ai tha se Ndoka po vepron me bekimin e Ramës, pavarësisht se ligji për dekriminalizimin, i nxitur nga opozita dhe ndërkombëtarët, e nxorri atë nga Parlamenti.

"Departamenti amerikan i Shtetit e cilësoi të papranueshme që Arben Ndoka, i dënuar në Itali për trafik prostitucioni dhe rrëmbim personi, të ishte pjesë e Parlamentit.

Sekretari Kerry, pasi e vlerësoi dje në Tiranë procesin e dekriminalizimit, e veçoi atë si sukses dhe model që duhet ndjekur.

E megjithatë, ja ku është i zgjedhuri i Edi Ramës, i besuari i tij në Lezhë, duke prezantuar Prefektin e Qarkut. Ja ku është i dënuari që pas denoncimeve të opozitës, pas qëndrimeve të partnerëve ndërkombëtarë, dhe pasi ligji i dekriminalizimit e nxorri jashtë Parlamentit, sot, me bekimin e Edi Ramës, qeveris Lezhën, bën emërime, shkarkime, tenderime.

Vendos për çdo gjë. Edi Rama sfidon hapur dekriminalizimin, sfidon hapur mesazhin e z.John Kerry.

Ai vazhdon t’u japë pushtet personave të inkriminuar, vazhdon ti mbajë ata afër, dhe po i përgatit ata për zgjedhjet që po vijnë për të deformuar votën e lirë.

Si ta kuptojmë qytetarët këtë shpërfillje të Edi Ramës ndaj mesazhit të Kerrit?

Si duhet ta shohë publiku inkriminimin deri në palcë që Edi Rama tashmë po i bën edhe Partisë Socialiste. Ende pa u mbushur 24 orë nga mesazhi i sekretarit Kerry për dekriminalizimin, Edi Rama po konfirmohet si promotor dhe protektor i krimit në politikë". /albeu.com/

Shtuar më 15/02/2016, ora 13:24

Shkruani komentin tuaj!
Të fundit nga kjo kategori