PD do të ndërtojë sistemin e vlerësimit të meritës dhe karrierës
Kandidati për kryetar i PD Lulzim Basha ka prezantuar platformën e tij për drejtimin e partisë në Lushnje, Peqin dhe Gramsh. Në platformën e zotit Basha për fillimin e ri të PD anëtarët dhe simpatizantët do të jenë pjesë e vendimmarrjes organizative dhe politike të partisë. Zoti Basha garantoi se nën drejtimin e tij PD do të ketë një sistem të vlerësimit të meritës dhe karrierës së çdo antari të PD nga më i vjetri deri tek më i riu. Nuk do të ndodh më sipas Bashës, që kontributi i anëtarëve dhe militantëve të harrohet sa herë PD fiton zgjedhjet.

Partia Demokratike do të ndërtojë një sistem transparent dhe të drejtë të kreditimit, të meritës dhe karrierës. Ne e dimë fare mirë se më të përkushtuarit mes nesh, më gjigandët në kontribute janë gjithmonë të fundit në pretendime, të fundit në kërkesa, të fundit në përfitime”– u shpreh z. Basha.

Zoti Basha theksoi se çdo anëtar i PD-së duhet të jetë krenar për trashëgiminë e çmuar të kësaj partie, trashëgimi e cila do të jetë sipas Bashës gurë themeli i fillimit të ri të saj.

“Ne jemi partia që shëmbi komunizmin, ne jemi partia që pas gjeneratash harrese, riktheu para shqiptarëve idealet e shoqërisë së lirë. Pas 20 vitesh që u antarësuam në Këshillin e Evropës ishim prapë ne që nënshkruam MSA, ishim ne që morëm ftesën për në NATO, ishim ne që e anëtarësuam vendin në NATO, ishim ne që i hoqëm vizat dhe i kthyem dinjitetin shqiptarëve, jemi ne që iu dhamë shqiptarëve infrastrukturën më moderne rrugore dhe energjitike që vendi ka njohur ndonjëherë dhe për këtë çdo demokrat dhe demokrate sot duhet të jetë shumë krenarë. Ky është një gurë i rëndë themeli që nuk e lëviz dot askush e aq më pak mazhoranca e votës së deformuar, të blerë dhe të korruptuar të 23 qershorit.” –theksoi z. Basha.

Duke akuzuar Edi Ramën se po kërkon të drejtojë qeverinë nga PS-ja, zoti Basha tha se opozita dhe çdo qytetar shqiptarë, i cili që sot ndjehet i mashtruar nga premtimet e kësaj mazhorance, duhet të përgatitet për të mbrojtur institucionet e këtij vendi nga modeli i partisë-shtet.
Shtuar më 13/07/2013, ora 14:26
Shkruani komentin tuaj!
Të fundit nga kjo kategori