Pas tentativës për vrasje në Shqipëri, i riu u vra mes natës në Belgjikë
Pëlqej
Vazhdojnë hetimet për vrasjen e shqiptarit në Belgjikë i cili u ekzekutua me armë zjarri në një lokal ku punonte kamarier. Viktima është Kreshnik Gjini dhe sipas mediave belge vrasja e tij mund të jetë hakmarrje nga shqiptarë të tjerë.

Ata thonë se dy vrasësit u larguan drejt një zone të pyllëzuar pas krimit, duke ju referuar dëshmisë së koleges së viktimës e cila pa te gjithe skenen e krimit.

Kreshnik Gjini punonte kamarier në një lokal në Saint-Denis. Mbrëmjen e së martës, pasi kishte mbaruar turnin, u largua me kolegen e tij kamariere.

Këtë të fundit do ta shoqëronte me makinë në shtëpi, pasi nuk kishte mundur të arrinte tramvajin e fundit mbrëmjen e së martës. Të dy shkuan drejt parkingut ku shqiptari kishte makinën. Sapo 31-vjeçari u fut në automjet, aty u shfaqën dy persona të maskuar, shkruan Panorama.

Ata e qëlluan me dy plumba duke e lënë të vdekur në vend.

Sa i përket të dashurës së tij Cristina, me sytë e saj të skuqur, u jep hetuesve një pistë për vrasjen e tij, duke thënë se një nga xhaxhallarët e tij, pak më i madh se Kreshniku, u vra një vit më parë në Shqipëri. “Prej një viti, ai ndihej i kërcënuar”, tha ajo.

NGJARJET NE SHQIPERI

Mediat belge hedhin dyshime se vrasja mund të ketë si motive ngjarje të ndodhura në Shqipëri.

Në fakt, Gjini më 30 gusht të vitit 2008 ka tentuar të vrasë me armë zjarri një person në Rrëshen.

Në ngjarje është përfshirë edhe vëllai i tij Besmiri, i cili mbeti i plagosur aksidentalisht nga një plumb që e qëlloi në pjesën e dorës nga vëllai i tij.

“Vëllezërit Kreshnik dhe Besmir Gjini janë konfliktuar me shtetasin Elidon Gjoka.

Pas konfliktit ata e kanë goditur Gjokën me mjete të forta dhe ai i është kundërpërgjigjur.

Kreshnik Gjini ka qëlluar me pistoletë ndaj Elidon Gjokës me qëllimin për ta vrarë por plumbi ka kapur gabimisht vëllanë e tij, Besmir Gjini”,– ka deklaruar policia në atë kohë.

Pas kësaj Kreshnik Gjini ka hedhur armën e krimit dhe ka transportuar të vëllanë në spitalin e qytetit të Rrëshenit.

Por gjendja e tij shëndetësore ka qenë e rëndë dhe ai është dërguar me urgjencë për në Spitalin Ushtarak në Kryeqytet.

Fillimisht policia kreu arrestimin e shtetasit Kreshnik Gjini, i cili deklaroi se ka plagosur pa dashje të vëllanë.

Të dy vëllezërit akuzohen për veprat penale të vrasjes me paramendim të mbetur në tentative dhe armëmbajtje pa leje. /albeu.com/

Shtuar më 07/09/2017, ora 11:25
Shkruani komentin tuaj!
Të fundit nga kjo kategori