Rreth 2000 persona i janë bashkuar protestës së Partisë Socialiste në Lushje për rrëzimin e qeverisë së drejtuar nga kryeministri Sali Berisha, me sloganin “Saliu dështoi, transparencë”. Në protestë ishin të pranishëm kryetari i Partisë Socialiste, Edi Rama, kreu i PLD-së Spartak Ngjela si dhe deputetë të tjerë socialistë të rrethit të Lushnjes.

Gjatë fjalës së tij përpara të pranishmëve, Ngjela ka theksuar se kjo proteste ashtu sikurse dhe të tjerat të cilat do të realizohen më tej janë për të luftuar një kauz, pasi Berisha po mban peng kutitë e materialeve zgjedhore.

“Kemi një vit që luftojmë për transparencë. Berisha nuk ka respekt për popullin shqiptar. Ne jemi këtu për të drejtat tona, pasi Berisha i ka veshët me dyll, ka deklaruar Ngjela”.

Gjatë fjalës së tij përpara të pranishmëve, kreu socialist Edi Rama nënvizoi bindjen e opozitës për të vazhduar betejën, për atë që socialistët e quajnë “Luftë kundër korrupsionit, keqqeverisjes, varfërisë dhe krizës totale”.

“Berisha dështoi, duhet të largohet. Fëmijët tanë s’meritojnë këtë vend. Beteja jonë është e pandalshme.” theksoi Rama.

Ndërsa përmendi problemet thelbësore me të cilat, sipas tij po përballen sot shqiptarët, kryesocialisti u shpreh se “kryeministri ka marrë peng demokracinë dhe po mbyt ekonominë e vendit”.