Parlamenti, tashmë me laptopë dhe iPad-ë
Kompjuterët e shumëpërfolur të vendosur në sallën e Parlamentit do të largohen nga aty, për t’u shërbyer deputetëve në zyra dhe administratës së Kuvendit në Kryesinë e tij. Parlamenti do të çelë këta muaj një tender për të blerë kompjuterë të rinj e për t’i vendosur në sallën e seancave dhe, ndër mundësitë, janë blerja e kompjuterëve me ekrane më të vegjël, ose iPad-eve apo laptopëve. Një çështje e tillë është diskutuar në mbledhjen e Konferencës së Kryetarëve para Vitit të Ri, shkruan "Panorama".

Sekretarja e përgjithshme e Kuvendit, Albana Shtylla, u ka bërë me dije krerëve të grupeve parlamentare se veç 140 kompjuterëve në sallën e Kuvendit, janë prezentë edhe 90 të tjerë në magazinë për projektin e Parlamentit dixhital.

Shtylla ka bërë me dije se në kuadër të projektit e-goverment dhe e-parlament, Kuvendi do të nisë procedurat për blerjen e kompjuterëve të rinj dhe se me kompjuterët në sallën e seancave do të zëvendësohen kompjuterët e zyrave të administratës, që sipas saj janë problematikë.

"Nga Drejtoria e IT-së, duke qenë se ka pasur pretendime për madhësinë e tyre, është sugjeruar që këto pajisje që janë në sallë dhe ato që janë në magazinë, të vendosenzyrat e deputetëve, në Kryesi dhe meqë është parashikuar të kemi fonde për shpenzime për vitin që vjen për blerje kompjuterësh, do të blihen, por shpenzimet do të jenë për aparatin në këtë rast dhe stafin për sa i përket e-parlament. Jo të gjitha zyrat kanë kompjuterë. Një pjesë e këtyre kompjuterëve janë problematikë. Në magazinë janë të paktën 90 copë, por për e-parlamentin. Ne këtë duam, meqë janë blerë për këtë projekt të zhvendosen në zyrat tuaja. Dhe vitin që vjen të gjendet një zgjidhje tjetër, në bashkëpunim me ju, forma më e përshtatshme e kompjuterëve që do të vendosen në sallë", ka bërë me dije sekretarja e Përgjithshme.

Gjatë diskutimit, kryetarja e Komisionit të Shëndetësisë, Albana Vokshi, ka kërkuar shpjegime nëse këta kompjuterë do të vendosen në komisionet parlamentare, por sipas sekretares së Përgjithshme për komisionet do të gjendet zgjidhje tjetër.

"Në komisione do të gjendet një formë tjetër që të mos ketë pengesë vizive. E-parlament ka edhe një element tjetër që në zyrat e komisioneve, në sallën e Kuvendit dhe në ambiente të tjera të Kuvendit, deputeti mund të aksesojë me një ipad apo celular të tij. Pra, do të ketë akses dhe me një kompjuter personal. Megjithëse deputetët mund të kenë nevojë për një kompjuter tjetër", tha ajo. /albeu.com/
Shtuar më 07/01/2014, ora 16:40
Shkruani komentin tuaj!
Të fundit nga kjo kategori