Parlamenti shqiptar miraton hapjen e dosjeve
Albeu.com
Maxhoranca voton me 76 vota për dënimin e krimeve të komunizmit, rishikimin e datave historike dhe konsideron Enver Hoxhën diktator të egër dhe hapjen e dosjeve të ish bashkpunëtorëve të Sigurimit të Shtetit.Ndizet drita jeshile për të zbardhur dokumentet sekrete të një pjese të dosjeve për ish bashkpunëtorët e Sigurimit të Shtetit. Parlamenti miratoi dje me 76 votat pro të maxhorancës, rezolutën “Për dënimin e krimeve të kryera nga regjimi komunist në Shqipëri”, ku në një prej pikave është përcaktuar hapja e dosjeve të ish bashkpunëtorëve të Sigurimit të Shtetit, çështje kjo që ka ngjallur mjaft debate gjatë kësaj kohe. Drafti përfundimtar i miratuar dje në seancën plenare, ku mungonte opozita, ishte produkt i punës së grupeve parlamentare të shumicës. Ndërkohë në rezolutë nuk është përfshirë asnjë prej pikave të përfshira në projekt-rezolutën e hartuar nga grupi parlamentar i PS-së. Ndonëse dje grupi i punës i caktuar nga Kuvendi u mblodh paraprakisht gjatë mesditës, për të hartuar një draft përfundimtar, qëndrimet, kanë qenë të ndryshme dhe thuajse të papajtueshme për shumicën e çështjeve që do të përfshiheshin në draft. Sipas deputetit të PD-së, Aleksandër Biberaj, i ngarkuar për hartimin e draftit përfundimtar, njëkohësisht kryetar i delegacionit të Parlamentit shqiptar pranë Asamblesë Parlamentare të Këshillit të Evropës, ishte e pamundur që të dilej me një qëndrim të përbashkët me opozitën, pavarësisht se ftesa ishte e hapur për këtë gjë. Gjatë debateve të pakta para miratimit të rezolutës, deputeti Spartak Ngjela, tërhoqi vërejtje se nuk ishte lënë kohë të gjithë deputetëve të jepnin mendimin e tyre për të amenduar rezolutën, pasi dokumenti ishte shpërndarë vetëm një orë para votimit. Ndërkaq deputeti tjetër i PD-së Ylli Pango, kërkoi që të përcaktohej më qartë në rezolutë rishikimi i teksteve të historisë, për të gjithë sistemin shkollor, pasi sipas tij pika 13 e rezolutës është e paqartë. Po kështu propozim për të shtuar një pikë në rezolutë, bëri edhe deputeti Arjan Starova, i cili tha se duhej përcaktuar edhe dënimi i krimeve ekonomike të komunizmit që në ndonjë rast janë quajtur edhe atentat. Por Biberaj, vërejti se çështja ekonomike e nxirrte rezolutën nga konteksti i saj politik.
Rezoluta
Rezoluta e miratuar dje në mbrëmje nga Kuvendi, është plotësuar më mjaft elementë dhe pika të tjera, në krahasim me draftin fillestar që paraqiti PD-ja disa javë më parë, kur edhe nisi debati për një dokument të tillë. Si referencë për të hartuar rezolutën në fjalë, Kuvendi merr rezoluën e Asamblesë Parlamentare të Këshillit të Evropës, 1096 e vitit 1996 si dhe rezolutës “Domosdoshmëria për dënimin ndërkombëtar të krimeve të regjimeve totalitare komuniste” i shoqatës Mbarëkombëtare për Integrim të të Përndjekurve Politikë. Në shumë pika të rezolutës, regjimi komunist i drejtuar nga Enver Hoxha konsiderohet si totalitar e që qeverisi vendin nëpërmjet ushtrimit të terrorit fizik, gjenocidit për shkak të origjinës, burgosjes, internimit, dhunimit të lirisë së ndërgjegjes e të mendimit. Më tej rezoluta ndalet në faktin se partitë që trashëguan strukturat, anëtarësinë dhe pronat e PPSH-së nuk kanë shprehur vullnetin për t’u distancuar nga regjimi totalitar dhe lufta e klasave e asaj kohe. Rezoluta vëren se rënia e regjimit komunist, nuk u pasua me një hetim të krimeve të kryera prej tij. “Kuvendi i Shqipërisë shpreh bindjen se njohja dhe denoncimi i krimeve të diktaturës, i shërben shmangies së përsëritjes së krimeve të ngjashme në të ardhmen. Ndëshkimi i krimeve të kryera dhe rivlerësimi real i historisë luan një rol të rëndësishëm në edukimin e brezave të rinj”, - thuhet në pikën 6 të rezolutës. Kështu diktatori Enver Hoxha, dënohet si ideatori, frymëzuesi dhe ekzekutuesi i sistemit më të egër diktatorial në Evropën Lindore. “Kuvendi kërkon rishikimin e datave simbol të sistemit komunist që shënojnë instalimin e diktaturës komuniste në Shqipëri si dhe heqjen e këtyra datave nga protokollet zyrtare shtetërore”, - vijon rezoluta në pikën 9. Ndërsa në pikën 11 është parashikuar hapja e dosjeve për bashkpunëtorët e sigurimit të shtetit. “Kuvendi kërkon hapjen e dosjeve të ish bashkpunëtorëve të Sigurimit të Shtetit për politikanët, drejtuesit e institucioneve kushtetuese, atyre të sistemit të drejtësisë, të administratës publike qendrore e lokale, si dhe të medieve kombëtare audio-vizive apo të shkruara”, thuhet në rezolutë. Më tej ftohen partitë postkomuniste që të rikonsiderojnë historinë e komunizmit dhe të kaluarën e tyre duke u distancuar nga krimet e kryera nga regjimi komunist. Nga ana tjetër në pikën 13 ftohen akademikët, historianët dhe ekspertët e pavarur të intensifikojnë kërkimet e tyre për përcakimin dhe verifikimin objektiv të historisë së Shqipërisë gjatë diktaturës komuniste. Po kështu Kuvendi mbështet hartimin e një strategjie kombëtare për eliminimin e pasojave të totalitarizmit gjysmëshekullor në Shqipëri, dhe fton institucionet shteëtsore të përmbushin detyrimet ligjore lidhur me statusin e të përndjekurve politikë, për arsimimin, punësimin, strehimin dhe dëmshpërblimin.



Rezolutë

Për dënimin e krimeve të kryera nga regjimi komunist në Shqipëri



1. Kuvendi i Shqiperise i referohet Rezolutave te Asamblese Parlamentare
te Keshillit te .Europesdhe konkretisht, Rezolutes 1096. (1996) "Masat për të çrrenjosur trashëgimin e sistemeve totalitare komuniste", Rezolutës 1481 (2006) "Domosdoshmeria per denimin nderkombetar te krimeve te regjimeve totalitare komuniste", si dhe vendimeve te Konventes se Pare Kombetare te Shoqates Mbarekombetare per Integrimin e te Perndjekurve Politike dhe Qendres Shqiptare te Rehabilitimit te, te Mbijetuarve te Tortures "Per denimin e krimeve te komunizmit në Shqiperi", date 12.05.2006.

2. Regjimi totalitar komunist i Enver Hoxhes dhe klikes se tij, qe qeverisi Shqiperine pas Luftes se Dyte Boterore deri ne vitin 1990, u karakterizua nga: dhunimi masiv i te drejtave te njeriut, vrasjet dhe ekzekutimet individuale e kolektive (me dhe pa gjygj), vdekjet ne kampet e perqendrimit, vdekjet nga uria, torturat, debimet, puna skllaveruese, terrori fizik dhe psikologjik, genocidi per shkak te origjines politike apo trashegimise se prones si dhe dhunime te lirise se ndergjegjes, mendimit dhe shprehjes, lirise se shtypit, lirise se besimit fetar dhe .lirise se pluralizmit politik.

3. Partite qe juridikisht trasheguan strukturat, anetaresine dhe pronat e PPSH-se, nuk kane shprehur deri sot vullnetin per t'u distancuar nga regjimi totalitar komunist, nga "lufta e klasave" dhe "diktatura e proletariatit" si dhe krimet e Enver Hoxhes dhe klikes se tij.

4. Renia e regjimit komunist ne Shqiperi nuk u pasua me nje hetim te krimeve te kryera prej tij, aq me teper qe autoret e ketyre krimeve nuk u perballen asnjehere seriozisht me drejtesine dhe nuk u kerkuan falje publike viktimave te genocidit komunist.


5. Rrjedhimisht, ndergjegjesimi i opinionit publik shqiptar, sidomos i brezit te ri, per krimet çnjerezore te kryera nga regjimi diktatorial i Enver Hoxhes eshte mjaft i dobet.

6. Kuvendi i Shqiperise shpreh bindjen se njohja dhe denoncimi i krimeve te diktatures komuniste, i sherben shmagies se perseritjes se krimeve te ngjashmene te ardhmen. Ndeshkimi i krimeve te kryera dhe rivleresimi real i historise luan nje rol te rendesishem ne edukimin e brezavete rinj.

7. Kuvendi i Shqiperise denon fuqimisht dhunimin masiv te te drejtave te njeriut te kryer nga regjimi totalitar komunist i Enver Hoxhes dhe klikes se tij.

8. Kuvendi i Shqiperise denon diktatorin Enver Hoxha si ideatorin, frymezuesin, drejtuesin dhe ekzekutuesin e sistemit me te eger diktatorial-komunist ne Europen- Lindore qe çoi ne izolimin dhe varferimin e tejskajshem te Shqiperise dhe kerkon heqjen e te gjithe titujve dhe dekoratave te dhena atij e bashkepunetoreve te tij nga regiimi komunist.

9. Kuvendi i Shqiperise kerkon rishikimin e datave simbol te sistemit komunist qe shenojne instalimin e diktatures komuniste ne Shqiperi si dhe heqjen e ketyre datave nga protokollet zyrtare shteterore.

10. Kuvendi i Shqiperise kerkon berjen publike te te gjitha dokumenteve qe deshmojne krimet e regjimit komunist perfshire edhe dosjet e krijuara ne ish-institucionet e perndjekjes dhe denimeve politike si Sigurimi i Shtetit, Prokurorite, Gjykatat dhe Komitetet e Debim-Internimeve.

11. Kuvendi i Shqiperise kerkon hapjen e dosjeve te ish-bashkepunetoreve te Sigurimit te Shtetit per politikanet, drejtuesit e institucioneve kushtetuese, atyre te sistemit te drejtesise, te administrates publike qendrore e lokale, si dhe te mediave kombetare audio-vizive apo te shkruara.

12. Kuvendi i Shqiperise fton partite komuniste dhe post-komuniste ne Shqiperi, qe te rikonsiderojne historine e komunizmit dhe te kaluaren e tyre, te distancohen qartesisht nga krimet e kryera nga regjimi komunist dhe nga diktatori Enver Hoxha duke i denuar ato pa asnje medyshje.

13. Kuvendi i Shqiperise fton akademiket, historianet dhe ekspertet e pavarur qe t'i intensifikojne kerkimet e tyre per percaktimin dhe verifikimin objektiv te historise se Shqiperise gjate diktatures komuniste.

14. Kuvendi i Shqiperise vlereson se viktimat e krimeve te regjimit totalitar komunist si dhe familjet e tyre, meritojne respekt dhe mirekuptim per vuajtjet e tyre si dhe mirenjohje per qendresen e tyre ndaj diktatures.

15. Kuvendi i Shqiperise mbeshtet hartimin e nje strategjie kombetare per eleminimin e pasojave te totalitarizmit gjysmeshekullor ne Shqiperi dhe fton institucionet shteterore te permbushin te gjitha deturimet ligjore lidhur me statusin e te perndjekurve politike per integrimin, arsimimin, punesimin, strehimin dhe demshperblimin e tyre ne nje kohe sa me te shpejte, si dhe akordimin e nje fondi per gjetjen e te zhdukurve dhe te vrareve me apo pa gjyq per. arsye politike.

16. Kuvendi i Shqiperise nxit fillimin e nje fushate kombetare per ndergjegjesimin rreth krimeve te kryera ne emer te ideologjisë komuniste duke perfshire rishikimin e librave shkollore, shpalljen e nje dite kombetare per perkujtimin e viktimave te komunizmit, hapjen e muzeumeve, perfshire edhe kthimin ne muze te burgjeve te tmerrshme politike, si dhe ngritjen e memorialeve ne nderim te shqiptareve qe u vrane per kundervënien ndaj regjimit totalitar.

17. Kuvendi i Shqiperise mbeshtet orgarnzimin e nje konference kombetare me pjesemarrjen e perfaqesuesve te parlamentit, qeverise, partive politike, shoqatave te te persekutuarve, akademikeve, historianeve si dhe eksperteve te OJQ-ve, per krimet e kryera nga regjimet totalitare komuniste. Anila Rama, Shekulli
Shtuar më 31/10/2006, ora 09:38
Tage: arkiv
Shkruani komentin tuaj!
Të fundit nga kjo kategori