Përcillet për në banesën e fundit, Kosta Trebicka
Albeu.com
I shoqëruar nga familjarë, të afërm e përfaqësues të politikës, në orën 15:00 arkivoli që mbante trupin e tij doli nga shtëpia e familjes Trebicka në Sauk të kryeqytetit.Përcillet për në banesën e fundit trupi i pajetë i biznesmenit shqiptaro amerikan, Kosta Trebickës. I shoqëruar nga familjarë, të afërm e përfaqësues të politikës, në orën 15:00 arkivoli që mbante trupin e tij doli nga shtëpia e familjes Trebicka në Sauk të kryeqytetit. Një varg makinash e kanë shoqëruar atë deri në varrezat e Tufinës, ku dhe do të prehet përjetësisht.

Përfaqësues të politikës kanë vizituar më parë familjen Trebicka ku kanë shprehur ngushëllimet. Kosta Trebicka është cilësuar si një nga dëshmitarët kyç për zbardhjen e hetimeve lidhur me tragjedinë e Gërdecit.

Ndërkohë, ngjarja ndodhi më datë 12 shtator 2008, kur rreth orës 15:00, në vendin e quajtur “Kullat e Gjergjovicës”, gjashtë kilometra larg fshatit Gjergjovicë dhe tre kilometra larg fshatit Voskopojë të rrethit Korçë është gjetur pa jetë trupi i shtetasit Kosta Trebicka, i biri i Gaqos, dhe i Pandorës, i datёlindjes 1958, lindur dhe banues nё Tiranë.

Kosta Trebicka lindi në Korçë, por pas marrjes së nënshtetësisë amerikane ai jetonte në SHBA. Biznesmeni Kosta Trebicka u bë i njohur për publikun kur denoncoi në media aferën korruptive mes kompanisë AEY dhe MEICO-s për tregtinë e armëve. Denoncimi i tij mbi këtë aferë u bë disa ditë pas shpërthimit të fabrikës së demontimit Alba Demil në Gërdec më 15 mars 2008.

Trebicka zbardhi para kamerave skemën e aferës me armët e ushtrisë shqiptare dhe sasinë e parave që supozohet se kanë përftuar personat e implikuar në këtë aferë.

Sipas asaj që ai vetë ka rrëfyer, në vitin 2007, është kontraktuar nga kompania amerikane AEY, e cila drejtohej nga 22-vjeçari Efraim Diveroli për të bërë paketimin e municionit. Por gjatë fazës së parë të punës, Trebicka mësoi se futja në skenë e kompanisë "EVDIN" me administrator Henri Tomein kishte shkaktuar dyfishimin e çmimit, fakt të cilin ia bën me dije Diverolit.

Pas këtij momenti, Trebicka i është shmangur nga zbatimi i kontratës, proces pune të cilën MEICO "ia dhuroi" Delijorgjit, duke bindur edhe pronarin e AEY-së. Historia bëhet edhe më e rëndë, kur Diveroli vjen në Shqipëri për të negociuar një çmim të dytë e kur në një takim të fshehtë me Pinarin, Delijorgjin dhe një djalë të moshës 27-30-vjeç. "Kjo punë ka shkuar shumë larg, tek djali i kryeministrit", - thotë Diveroli në bisedën e përgjuar nga Trebicka, (të bërë publike nga vetë ky i fundit për mediat shqiptare), duke i pohuar se djalin e panjohur ia kishin prezantuar si Shkëlzen Berisha.

Trebickës i janë marrë dëshmi edhe nga Prokuroria Shqiptare. Ai ka pohuar për hetuesit e Prokurorisë së Përgjithshme se MEICO kishte si qëllim të sabotonte furnizimin e AEY, pasi tregtia e skrapit ishte më fitimprurëse. Investigimi i gazetës prestigjoze, "The New York Times" nxorri në sipërfaqe gjithashtu skandalin me fishekët shqiptarë, një pjesë e të cilëve ishin shumë të vjetër dhe jashtë standardit. Gazeta prestigjoze i referohej trenskriptit të bisedës që u regjistrua me celularin e Kosta Trebickës. (start)
Shtuar më 15/09/2008, ora 16:59
Tage: arkiv

Shkruani komentin tuaj!
Të fundit nga kjo kategori