Gomonia e zhdukur në Otranto u nis nga Shqipëria
Update- Ende asnjë gjurmë nga gomonia e zhdukur mbrëmë në kanalin e Otrantos. Forcat e Armatosura njoftojnë se megjithe kerkimet intensive nuk eshte gjetur ndonje gjurme e gomones me 27 persona në bord e cila sipas mediave italiane ishte nisur nga Shqipëria.

“Sipas komunikimit me MRCC Romë, dje më datë 2 shtator 2013, në orën 20.50, nga kanali i Otrantos është marrë një sinjal SOS nga një gomone me rreth 27 vetë në bord, të cilët dyshohet se janë klandestinë. Menjëherë në drejtim të rajonit të raportuar janë nisur dy anijet e gatshme të Rojës Bregdetare, nga bazimi i Pashalimanit dhe Porto-Palermos, të cilat kanë kryer operacion kërkimi në det deri në orët e para të mëngjesit të sotëm”- thuhet ne njoftimin per shtyp.

Sipas tij, edhe pse kërkimet kanë qenë intensive, nuk është bërë e mundur gjetja e gomones, për arsye të mungesës së të dhënave të sakta të vendndodhjes, si dhe të zonës së gjerë ku u zhvilluan kërkimet.

Ndërkohë që drejtori i Qendrës Operacionale të Durrësit në një intervistë për Tv A1 Report, Shefqet Bruka deklaroi se personi që ka dhënë alarmin SOS ka folur shqip dhe ka thënë që kishte klandestinë kurd në bord.

“Është kërkuar SOS nga një person që flet shqip. Ai kërkonte ndihmë për shkak të një problemi në motor dhe ka thënë se kishte klandestinë kurd në bord. Pas verifikimeve që ka bërë pala italianë, në fillim ajo angazhoi 4 mjete e një helikopter. Zona nga ka ardhur apeli për ndihmë i përket zonës së kërkim shpëtimit që mbulohet nga pala italiane dhe pala italiane ka drejtimin e operacionit, ne jemi në ndihmë”- tha Shefqet Bruka.


10:12-Një gomone me 27 persona në bord rezulton e zhdukur nga mbrëmja e kaluar në kanalin e Otrantos. Gjatë natës por edhe ditës së sotme Roja Bregdetare ka zhvilluar një operacion kërkimi në kanalin e Otrantos, pas njoftimit të marrë nga Shërbimi SAR i Romës, Itali.

Edhe pse kërkimet kanë qenë intensive, nuk është bërë e mundur gjetja e gomones, për arsye të mungesës së të dhënave të sakta të vendndodhjes, si dhe të zonës së gjerë ku u zhvilluan kërkimet. /albeu.com/
Shtuar më 03/09/2013, ora 17:12
Shkruani komentin tuaj!
Të fundit nga kjo kategori