Sekretari i Përgjithshëm i OSBE-së Lamberto Zannier ka kerkuar nga forcat politike angazhim serioz per vazhdimin e dialogut politik. Në një konferencë të përbashkët me kryeministrin Berisha ai u shpreh se OSBE mbështet dialogun politik në Shqipëri dhe është e gatshme të kontribuojë për këtë.

”Shteti i së drejtës nuk vlen vetëm për Shqipërinë por është një prioritet global. Këto vende duhet të bëjnë reformime në sektorin e drejtësisë. Disa nga prioritet për Shqipërinë janë lufta kundër korrupsionit, një qeverisje më e mirë ekonomike etj. Unë kam kontakte edhe me komisionerin Fyle për të bërë të mundur ta ndihmojmë Shqipërinë” tha Zannier.

Ndërsa kryeministri Berisha e vuri sërish theksin tek zgjedhjet e 2013-ës, duke siguruar se mazhoranca do të bëjë gjithçka për një proces zgjedhor të lirë e të ndershëm.

“Në vitin 2009, zoti Rama deklaroi se procesi zgjedhor do të ishte historik, por kur nuk gjeti votat që donte ndryshoi qëndrim. Shqiptarët zhvilluan zgjedhje të lira dhe unë jam i vendosur për zgjedhje të lira e të ndershme, në 2013-ën.”- deklaroi kryeministri. /albeu.com/