Oficeri i akuzuar nga Dajti: Ja çfarë ndodhi më 7 gusht 2009
Zbardhet rrefimi i oficerit të njësisë së vëzhgimit F.G ndaj të cilit i pandehuri Dajti ka drejtuar gishtin e akuzës, duke e cilësuar si autor të vrasjes së Saimir Duçkollarit.



Sipas Gazetës Shqiptare në dëshminë e tij oficeri u ka treguar hetuesve, gjithçka ndodhi në 7 gusht 2009 në vendin e quajtur pista “Iliria”, ku operacioni policor për kapjen e njeriut të shumëkërkuar u shndërrua në një fushë beteje të përgjakshme.


I pyetur nga prokurori i Krimeve të Rënda, Henrik Ligori, oficeri i policisë, tregon fill e për pe, gjithë historinë e trishtë, që nga momenti kur e telefonuan për të marrë pjesë në operacion, rrugëtimin drejt Durrësit me Saimir Duçkollarin, i cili për fat të keq nuk do të kthehej më i gjallë. Ai rrëfen dhe për momentin tragjik, kur miku i tij u qëllua për vdekje, e pranon për herë të parë që qëlloi me armën automatike në drejtim të “Tuaregut” të Dritan Dajtit. Të njëjtat fakte që u ka pohuar hetuesve, oficeri F.G i ka rrëfyer në Gjykatën e Krimeve të Rënda, në procesin ndaj Dritan Dajtit.

Telefonata për takim
Ditën e premte në datën 7 gusht 2009 rreth orës 10.30 më ka marrë në telefon komandanti i grupit P.L, dhe ka kërkuar që të shkoj në zyrë për një problem pune. Aty pashë që kishin ardhur edhe kolegët e tjerë të grupit. Drejtori Arjan Muça dhe shefi i zyrës Fatos Xhani na vunë në dijeni të faktit se do të shkonim me shërbim në Durrës, për të lokalizuar një person me rrezikshmëri të lartë shoqërore të quajtur Dritan Dajti. Kisha dëgjuar për këtë si person i dënuar nga drejtësia dhe që ishte arratisur ndërsa gjykohej në Gjykatën e Tiranës, para disa vitesh. Nuk e njihja si fytyrë këtë person. Mua nuk mu caktua ndonjë detyrë e veçantë, ndërkohë që kuptova se do të veproja në përbërje të grupit. Drejtuesit na bënë instruktimet e rastit, duke na porositur veçanërisht të tregoheshim shumë të kujdesshëm.
Nisja drejt Durrësit
Rreth orës 13.15-13.20 morëm urdhër që të niseshim në drejtim të Durrësit. Unë kam qenë në përbërje të grupit ku bënin pjesë komandanti P.L dhe kolegu Saimir Duçkollari dhe lëvizëm me një automjet “Renault Megane” ngjyrë e zezë me targë të Gjirokastrës, nuk e mbaj mend me detaje. Makinën e drejtonte P., unë isha ulur në vend të parë dhe mbrapa ishte Saimiri. Ndërsa arritëm të Ura e Dajlanit nga P.L mësuam se personi i kërkuar ishte lokalizuar në afërsi të pistës “Iliria” në plazhin e Durrësit dhe ai përdorte një “Tuareg” të zi, me targa italiane. Na u referua gjithashtu se ky person mbante në kokë një kapele të kuqe. Di që P., këto të dhëna ju dhanë në telefon dhe ai ua shpërndau edhe kolegëve të tjerë sipas detyrave funksionale. U afruam tek rruga ku kthehesh për tek pista “Iliria”. Tek kjo rrugë na parakaloi makina e Fatos Xhanit, i cili më pas i komunikoi P.L me anën e radios që “Tuaregu” ndodhej i parkuar në kryqëzimin e një rrugice pranë një pallati. Këtë komunikim unë e dëgjova në radio. Fatosi kërkoi që të ishim në gatishmëri për ndërhyrje.

Ndërhyja për arrestim
Jemi afruar dhe u kthyem në një rrugicë nga e djathta. Aty ndërsa para nesh ndodhej automjeti tip “Golf” me të cilin lëvizte P.L me kolegë të tjerë, që nuk mund të them saktë se cilët ishin, dëgjova në radio që Fatosi dha urdhër të ndërhyhej. Unë e shihja “Tuaregun” e parkuar në anën e majtë të rrugës në anën e trotuarit. Kemi zbritur nga automjeti, unë me jelek antiplumb ngjyrë blu. Isha pas Saimir Duçkollarit, i cili u afrua pranë “Tuaregut”. Në krah nga e majta ime në kryqëzimin e rrugëve fiksova P.L. Kam parë Fatos Xhanin midis “Tuaregut” dhe murit të ndërtesës, por nuk e vura re nëse hyri nga para apo pas automjetit. Në atë çast u dëgjuan të shtëna armësh.
Vrasja e Duçkollarit
Saimiri që ishte para meje, i veshur me xhup të zi ku shkruhej “policia” nga para dhe nga mbrapa u afrua te dera e mbrapme e “Tuaregut” nga ana e pasagjerit dhe e hapi derën. Pashë një person brenda në makinë, me armë në të dyja duart, njërën prej të cilave e kishte të nikeluar dhe me mulli, i cili i mbështetur te dera prapa shoferit qëlloi në drejtim të Saimirit, i cili u rrëzua tek goma e pasme e “Tuaregut”. Pashë që i dilte gjak nga koka. Unë tentova të mbushja kallashnikovin dhe pashë që personi brenda automjetit qëlloi në drejtimin tim. Kam qëlluar në drejtim të derës së pasme të “Tuaregut”, u bë një shkrepje, por arma u bllokua pasi mori dy fishekë njëherësh dhe nuk munda ta zhbllokoja. Nuk pashë që personi të qëllonte nga brenda “Tuaregut” të zbriste nga dera që hapi Saimiri. I thërras P., që më ndihmoi të ngrija Saimirin, të cilin e futa në sediljen e pasme të “Golfit” dhe më pas unë nuk pashë çfarë ndodhi më tej. Mora drejtimin e makinës të cilën e ktheva në vend dhe me të u nisa drejt urgjencës së spitalit dhe nuk jam kthyer më në vendngjarje.
Mund të na shpjegoni ndonjë hollësi tjetër lidhur me ngjarjen, të cilën e keni parë vetë ose e keni mësuar nga kolegët tuaj?
Shpjegova sa kam parë me sytë e mi. Nga kolegët më pas mësova për kolegët e tjerë që u vranë dhe për arrestimin e Dritan Dajtit, i cili ishte plagosur. Nuk kam ndonjë gjë të veçantë për të shtuar.
U lexua, u konfirmua dhe u nënshkrua.
Shtuar më 08/07/2013, ora 13:12

Shkruani komentin tuaj!
Të fundit nga kjo kategori