Nishani "qeras" deputetët që e votuan
Një javë pasi mazhoranca ka votuar Bujar Nishanin për tu ulur në karrigen e Kreut të Shtetit, grupi parlamentar i PD-se ka ftuar në një darkë deputetët që morën pjesë në votimin e tij në Parlament. Presidenti Nishani është treguar korrekt në këtë darkë, duke mbërritur 5 minuta më herët se sa ora 20 e 30 që ishte parashikuar të shtrohej darka, pjesë e së cilës janë bërë edhe aletatët e PD-së në qeverisje. Më pas kanë qenë përfaqësues të lartë të Partisë Demokratike, kryetari i grupit parlamentar Astrit Patozi, kryetari i Bashkisë së Tiranës Lulzim Basha, kryetarja e Kuvendit Jozefina Topalli, Ministra të kabinetit qeveritar, Ridvan Bode, Sokoll Olldashi, Majlinda Bregu etj. Më pas për t`iu bashkuar kësaj darke ka mbërritur kreu i LSI-së Ilir Meta dhe në fund ka mbërritur rreth orës 20 e 40 Kryeministri Sali Berisha, i cili si gjithmonë ka përshëndetur edhe mediat që po ndiqnin këtë darkë. Ndërkaq kësaJ feste i është bashkuar edhe deputeti i larguar tashmë nga radhët e socialistëve Kastriot Islami, i cili mori pjesë në votimin e Presidentit Nishani, ndërsa kanë munguar deputeti Gazmend Oketa dhe kreu i PBDNJ-së Vangjel Dule, të cilët morën pjesë në votimin e e 11 qershorit për zgjedhjen e Kreut të Shtetit. Kjo nuk është festa e parë që mazhoranca organizon për fitoren e postit presidencial nga Bujar Nishani, edhe të hënën kur Parlamenti votoi për Bujar Nishanin, kryeministri Sali Berisha ka shtruar një darkë me përfaqësues të mazhorancës, por një darkë më e paktë në numër. Të dyja këto festa janë organizuar pa praninë e mediave. Bujar Nishani u zgjodh me 73 vota të mazhorancës në Parlament në raundin e katërt të votimit, ndërsa 1 votë ishte kundër dhe 2 të tjera të pavlefshme, opozita nuk mori pjesë në votim.
Shtuar më 19/06/2012, ora 22:48

Shkruani komentin tuaj!
Të fundit nga kjo kategori