Presidenti i Republikës, Bujar Nishani priti sot në një takim Kryetarin e Kontrollit të Lartë të Shtetit, zotin Bujar Leskaj. Presidenti Nishani ka shprehur vlerësime për punën e bërë deri tani nga Kontrolli i Lartë i Shtetit. Gjatë një takimi me kreun e këtij institucioni Nishani e inkurajoi zotin Leskaj për bashkëpunimin e ngushtë të këtij institucioni me institucionin e Prokurorisë shqiptare, në goditjen e çdo veprimtarie antiligjore dhe korruptive që konstatohet.


Kreu i Shtetit shprehu vlerësimin për Kontrollin e Lartë të Shtetit si një nga mekanizmat kryesorë të shtetit në monitorimin dhe kontrollin e veprimtarisë financiare dhe ligjore të institucioneve të tjera.

Kryetari i Kontrollit të Lartë të Shtetit e njohu Presidentin e Republikës me raportin më të fundit të KLSH-së dhe angazhimin e këtij institucioni për një punë profesionale dhe transparente në kontrollin dhe zbulimin e të gjitha rasteve të shkeljes së ligjit dhe të koordinimit me të gjitha institucionet e tjera të zbatimit të ligjit.

Nishani vlerësoi vizionin që Kreu i Kontrollit të Lartë të Shtetit, Bujar Leskaj ka për këtë Institucion në përmbushjen e misionit të tij kushtetues. /albeu.com/