Dhuna ndaj Strazimirit, rrëzohet kërkesa për pushimin e çështjes
Në lidhje me dhunën e ushtruar ndaj Genti Strazimirit për shkak të detyrës, është rrëzuar kërkesa për pushimin e çështjes. Gjykata e Lartë ka rrëzuar kërkesën e deputetit socialist Pjerin Ndreu për pushimin e çështjes, ku bashkë me kolegun e tij Arben Ndoka, po gjykohen për dhunën ndaj ligjvënësit demokrat Genti Strazimiri.

Raportohet se avokati i deputetit Ndreu, Baftjar Rusi, ka kërkuar nga trupi gjykues pushimin e çështjes për klientin e tij. Sipas tij, kallëzimi në organin e Prokurorisë nuk është bërë nga deputeti Genti Strazimiri, por nga Grupi parlamentar i PD-së.

Ndërkaq, trupi gjykues u tërhoq për marrjen e vendimit, i cili rrëzoi kërkesën e bërë nga avokati Rusi, ndërsa procesi gjyqësor do të vijojë normalisht me pyetjen e dëshmitarëve.

Seanca e radhës do të zhvillohet në 12 janar. Procesi do të zhvillohet me pyetjen e 9 dëshmitarëve, kryesisht deputetë që kanë dijeni për incidentin e ndodhur në ambientet e brendshme të Kuvendit të Shqipërisë.

Prokuroria ka vendosur që të marrë si të pandehur deputetët Arben Ndoka dhe Pjerin Ndreu, të akuzuar për kryerjen e veprës penale të “Goditjes për shkak të detyrës”. /albeu.com/
Shtuar më 24/11/2014, ora 12:24

Shkruani komentin tuaj!
Të fundit nga kjo kategori