Asnjë shpresë për sektorin e ndërtimit. Të dhënat e fundit të Institutit të Statistikave tregojnë për një përkeqësim të situatës në këtë degë të ekonomisë, e cila vetëm pak vite më parë jepte kontributin kryesor në rritjen e produktit të përgjithshëm kombëtar.

Sipas INSTAT-it në tremujorin e dytë të këtij viti, ndërtimi shënoi rënie me 18.4% krahasuar me të njejtën periudhë të një viti më parë, ndërkohë që kundrejt tremujorit të mëparshëm u ul me 12.1%

Rënia e kërkesës në vend për blerje banesash si edhe moslikuidimi i firmave të ndërtimit nga qeveria, për punimet e kryera në punimet publike dhe vecanërisht në infrastrukturën rrugore janë arsyet që kanë futur në ngërc këtë sektor.

Shoqata e ndërtuesve pretendon se qeveria ka borxhe të pashlyera në miliona euro, ndërkohë që Ministria e Financave është zotuar se do të shlyejë këto detyrime me të ardhuarat e privatizimit të kompanisë Albpetrol. /albeu.com/