Me anë të një deklarate për mediat, ministrja e Kulturës Mirela Kumbaro konfirmoi se Sheshi "Nënë Tereza” do të kthehet në pedonale çdo ditë nga ora 19:00-24:00. Duke i'u referuar vendimit të marrë nga Qeveria, ndalohet parkimi në të dyja anët e bulevardit "Dëshmorët e Kombit" si dhe në sheshin “Nënë Tereza”, në mënyrë që kjo zonë të kthehet në një shëtitore për qytetarët në orët e mbrëmjes.

“Qeveria mori vendimin për uljen e qarkullimit në disa zona kryesore dhe kthimin e tyre në pedonale, duke ndaluar plotësisht parkimin e makinave në sheshin “Nënë Tereza” dhe gjithë bulevardin.

Sheshi “Nënë Tereza” do të kthehet në pedonale nga ora 19:00-24:00. Ne vendosëm që të kufizohet qarkullimi i automjeteve të të gjitha kategorive në sheshin “Nënë Tereza”. Po ashtu, në 24 orë do të ndalohet parkimi në të dy anët e bulevardit, nga ura e Lanës në sheshin “Nënë Tereza”, deklaroi Kumbaro.

“Urdhri i është transmetuar edhe Bashkisë së Tiranës. I uroj gjithë qytetarëve të Tiranës shëtitje të këndshme të përnatshme. Të njëjtën gjë do bëjmë edhe për qendra të tjera me të njëjtën rëndësi historike kulturore”, përfundoi fjalën ajo. /albeu.com/