Fatos Nano mund të jetë kandidati zyrtar i Partisë Socialiste. Referuar qëndrimeve të deritanishme të kreut të Partisë Socialiste, kjo mund të tingëllonte si një “herezi” po gjithsesi janë shtuar zërat se mbledhja e sotme e kryesisë së Partisë Socialiste mund të ndërmarrë këtë hap, në kushtet kur procesi është futur në një fazë ku zgjedhja e kreut të shtetit mund të bëhet vetëm me votat e mazhorancës.

Kjo mundësi është artikuluar edhe në emisionin e gazetares Ilva Tare nga një prej këshilltarëve kryesorë të Fatos Nanos. Në rast se zyrtarizohet ky vendim, sipas Portalit Albeu, argumentimi që mund të jepet është ai se “fitorja” e betejës presidenciale mund të realizohet vetëm përmes një emri si Fatos Nano, për faktin se gëzon edhe mbështetjen e mazhorancës së djathtë, që nuk e kandidon dot për arsye parimore. Gjithsesi, asgjë nuk është zyrtare, ndaj duhet të presim mbledhjen e kryesisë socialiste për të parë nëse Nano do të jetë vërtetë emri që do të dalë nga selia rozë, apo në rast se kjo e fundit do të qëndrojë larg procesit, për të shmangur atë që cilësohet si “legjitimim” i procesit/albeu.com/