Shtëpia e Bardhë tha të premten se Rusia duket se po thellonte bashkëpunimin e saj të mbrojtjes me Iranin dhe se kishte marrë qindra dronë sulmues që po përdor për të goditur Ukrainën.
Duke cituar informacione të deklasifikuara rishtazi, Shtëpia e Bardhë tha se dronët, ose mjetet ajrore pa ekuipazh (UAV), u ndërtuan në Iran, u transportuan përtej Detit Kaspik dhe më pas u përdorën nga forcat ruse kundër Ukrainës.
“Rusia ka përdorur UAV-të iraniane në javët e fundit për të goditur Kievin dhe për të terrorizuar popullsinë ukrainase, dhe partneriteti ushtarak Rusi-Iran duket se po thellohet”, tha në një deklaratë zëdhënësi i Shtëpisë së Bardhë, John Kirby.
“Ne jemi gjithashtu të shqetësuar se Rusia po punon me Iranin për të prodhuar UAV-të iraniane nga brenda Rusisë”.
Kirby tha se SHBA kishte informacione se Rusia po merrte materiale nga Irani që kërkoheshin për të ndërtuar një fabrikë të prodhimit të dronëve që mund të funksiononte plotësisht në fillim të vitit të ardhshëm.
“Ne po publikojmë imazhe satelitore të vendndodhjes së planifikuar të kësaj fabrike të prodhimit të UAV-ve në Zonën e Posaçme Ekonomike Alabuga të Rusisë,” tha ai.
/Albeu.com/
