Mjekët neglizhojnë pacientin, 28 vjeçari vdes brenda 24 orëve
Në Spitalin e Lushnjës një 28 vjeçar vdes nga zemra brenda 24 orëve, pasi mjekët nuk e mbajtën në spital, por e dërguan në shtëpi vetëm më një ilaç për të vjellat. Mjeku i urgjencës dhe kardiologia e nxjerrin nga spitali pa ardhur përgjigja e analizave të gjakut dhe pa një diagnozë.

Pas vdekjes nis dhe odiseja e hetimit. Fillimisht prokuroria nis hetim për vdekje të papritur. Më pas zbulohet se ishte për shkak të neglizhencës së mjekëve. Mjekut ligjor Lushnje ju deshën 5 muaj të nxirrte aktin me shkakun e vdekjes, ku arsyeja ishte insufiçenca kardiake. Në bazë të këtij akti ekspertët e Tiranës nxjerrin fajtor mjekët. Ndërkohë prokuroria pas 9 muajsh akoma s’ka marrë në pyetje mjeken kardiologe e cila nuk ka ndjekur pacientin.

Grupi i xhirimit i emisionit Fiks Fare, udhëtoi drejt fshatit Fier-Seman të Dijvakës. Në një intervistë për Fiksin prindërit e 28 vjeçarit Adesmir Çina, pretendojnë se prokuroria dhe mjekët ligjorë Lushnje kanë zvarritur hetimet. Prindërit janë shumë të traumatizuar nga kjo histori. E kanë shumë të vështirë të tregojnë ngjarjen, pasi sipas tyre djali ishte mirë e bukur ” nuk e kuptuam se si iku ashtu” pohojnë ata. Nëna mes lotësh tregon se djali kishte dy ditë që kishte shqetësime, ankohej për mpirje të krahut dhe dhimbje të barkut. U vizitua tek mjekja e ambulancës e cila fillimisht tha që nuk ka gjë, por për shkak se rrugës për në ambulancë djalit i kishte rënë të fikët, ajo e këshilloi të shkonte të vizitohej në Lushnje. Drejt Lushnjes nisen menjëherë me taxi dhe në spital, i bie sërish të fikët.

“Atje i bëjnë vetëm një serum, sa e sollën në vete, i bën Ekg, skaner dhe e nxorrën brenda 1 ore e gjysmë, duke i dhënë me vete ilaç për të vjella.” -tregon me duart që i dridhen babai i Adesmirit të ndjerë.

Sipas tij mjekja kardiologe nuk i pa përgjigjet e analizave të gjakut. “Asnjë nuk e kontrolloi që troponina kishte dalë shumë e lartë. Atë natë djali kishte qenë më i qetë. Të nesërmen në 5 të mëngjesit djali nisi të ulëriste nga dhimbjet e barkut dhe krahut. Thirrëm ambulancën, erdhi por ishte shumë vonë për ta shpëtuar. Ai vdiq rrugës për në spital, duke ulëritur dhe duke i kërkua ndihmë mjekëve.” – vazhdon të tregoj nëna për herën e fundit që pa djalin e saj te vetëm gjallë. Ajo mes lotësh dhe dhimbje kërkon drejtësi për djalin. “Në fillim s’e dinim pse ndodhi, 5 muaj u zvarrit të nxirrnin vetëm arsyen e vdekjes. Tani që e morëm vesh që fajin e kanë mjekët duam drejtësi për djalin.Nuk besojmë tek mjekët e prokuroria ndaj ju drejtuam Fiksit”-shtoi ajo.

Të kontaktuar nga Fiksi në ambientet e punës dhe në telefon, mjekët Eriona Çuku e ambulancës së fshtatit dhe mjeku Besmir Nexha i urgjencës së spitalit Lushnjë, nuk pranojnë të flasin, pasi sipas tyre çështja është në prokurori.

Mjeku ligjor Lushnje 5 muaj për të nxjerrë shkakun e vdekjes

Mjekut ligjor Dr Anton Samarxhiu, ju deshën 5 muaj për të nxjerrë në dritë arsyen e vdekjes. Sipas dokumnetacionit kqyrja kufomës është bërë që më datë 19 shtator 2019, ndërsa pranë prokurorisë akti i ekspertizës ka vajtur me 23 Janar 2020.

Ekspertiza Mjeko -Ligjore “Fajin e kanë mjekët

Pavarësisht se mjekët të cilët kanë ndjekur rastin nuk pranojnë të flasin, ekspertiza mjeko- ligjore e kryer nga ekspertët i ka nxjerrë zbuluar në të gjitha shkeljet që kanë bërë. Që nga mbajtja në urgjencë për vetëm 1 orë e 35 min e deri tek nxjerrja nga urgjenca pa diagnozë dhe pa dalë akoma përgjigja e analizave të gjakut, ku nëse do të shihej që troponina ishte shumë e lartë, jeta e djalit do të ishte shpëtuar.

Sipas kësaj ekspertize mjekja Fatmira Alla nuk ka ndjekur protokollin dhe ka neglizhuar në përcaktimin e diagnozës. Pacientit nuk i janë bërë as analizat minimale si gjaku komplet etj. Për të parë edhe gjendjen e tij në momentin e mbërritjes në Urgjencë.

Spitali Lushnje nuk ka një repart të Kardilogjisë, për këtë arsye në rastet e urgjencës, thirren mjekët e Poliklinkës Lushnje. Atë ditë në turn ishte Dr Fatmira Alla. Gazetaret e Fiksit nuk e gjetën në poliklinikën ku ajo punon ndaj e telefonuan për të pyetur në lidhje me rastin. Ajo fillimisht nuk pranon të flasë për rastin, madje në fillim pretendon se nuk e mban mend, por kur gazetari i kujton se kjo çështje është në prokurori, ajo thotë se diçka i kujtohet, por shumë pak. Ajo është e prerë për të mos takuar gazetarët dhe thotë se nuk është thirrur akoma në prokurori për ngjarjen. Për sa i takon përgjigjes së analizave të gjakut ajo tha “unë i thashë familjarëve që t’ja bënin, të më merrnin në telefon dhe nuk ishin të detyruar. Unë nuk u shkoj pacientëve me vrap nga pas, jam shumë e zënë’.

Në aktin e ekspertizës shprehet qartë se nga skaneri dhe ekot e bëra kishte të dhënë të mjaftueshme që i sëmuri të mbahej në observacion. Por ai është nxjerrë nga spitali akoma pa dalë përgjigja e analizave të gjakut që duhet të ishte lexuar nga kardiologia. Analizat tregonin se troponina në gjak ishte 5 fish më e lartë se norma. Neglizhenca e mjekës ka çuar në nxjerrjen nga spitali dhe më pas vdekjen e pacientit.

Fiks Fare u interesua për vonesat dhe zvarritjen pranë Prokurorisë së Lushnjes. Merita Selimi e cila është edhe prokurore e çështjes kërkoi një kërkesë me shkrim dhe nuk pranoi të takonte gazetarët. Në përgjigjen me shkrim prokuroria nuk ju përgjigj asnjë pyetje konkrete duke pretenduar se çështja është nën hetim, dhe se çdo përgjigje konkrete do të cënonte sekretin hetimor./tch
Shtuar më 02/07/2020, ora 21:51

Shkruani komentin tuaj!
Të fundit nga kjo kategori