Mjedisi, emergjencë kombëtare
Pëlqej
Ministri i Mjedisit Lefter Koka e cilësoi situatën mjedisore në vend, si emergjencë kombëtare dhe kërkoi sygjerime, se në cilat fusha duhet të ndërhyhet më parë. Gjatë një tryezë të përbashkët me përfaqësues të shoqatave të shoqërisë civile, Koka u shpreh se pyjet dhe lumenjtë kanë pësuar një dëmtim shumë të madh.



"Ne jemi në prag të ngritjes të një komiteti ministror, në fakt edhe Ligji i Menaxhimit të Mbetjeve na detyron, për t'i propozuar Qeverisë shqiptare shpalljen e një situate emergjence në shumë akse nacionale, por edhe në zona të tjera shumë të ndotura", tha Koka.

Ministri i Mjedisit, duke iu referuar shkatërrimit të pyjeve, deklaroi se po punohet për një projektligj për frenimin e eksportit të lëndës drusore dhe qymyrit të drurit.

"Pyjet dhe lumenjtë kanë pësuar një dëmtim shumë të madh. Pikërisht nesër kemi një bashkëpunim me Ministrinë e Brendshme për t'u bërë palë në këtë aksion të madh në mbrojtje të pyjeve. Me një projektvendim, që shumë shpejt do ta paraqesim para Këshillit të Ministrave, do të ndalojmë eksportin e drurit të papërpunuar, eksportin e qymyrit të drurit", tha Koka.

Përfaqësues të shoqatave të mjedisit akuzuan sipërmarrës, të cilët qëndrojnë pas zjarreve në pyje, për t'i hapur udhë biznesit të shitjes së drurëve në zonat e djegura.
Shtuar më 11/10/2013, ora 16:51
Shkruani komentin tuaj!
Të fundit nga kjo kategori