Shoferët shqiptarë duket se nuk kanë vënë mend. Pavarësisht masave të ashpra që policia rrugore ka ndërmarrë, disa shoferë vazhdojnë të lëvizin në rrugë si të “çmendur”.
I tillë është rasti i fundit i publikuar nga policia e shtetit. Një 40-vjeçar ka kryer manovër të rrezikshme me motorin e tij në autostradën “Fushë Milot – Thumanë”, duke rrezikuar veten dhe përdoruesit e tjerë të rrugës.
Më pas ai ka postuar videon në rrjetet sociale për tu mburrur te ndjekësit e tij. Siç duket në video 40-vjeçari nget motorin pa mbajtur duart në timon, ndërsa qendron në pjesën e pasme të mjetit.
Shoferi i motorit është ndëshkuar me masë administrative 20 000 lekë të rinj.
Njoftimi Policisë
Kurbin, Lezhë
Kreu manovër të rrezikshme me motomjet, në autostradë, rrezikoi veten dhe përdoruesit e tjerë të rrugës, si dhe e postoi videon e manovrës në rrjete sociale, ndëshkohet me masë administrative 20 000 lekë të rinj, 40-vjeçari.
Si rezultat i veprimeve të menjëhershme procedurale, të kryera nga shërbimet e Policisë Rrugore të Lezhës, pas publikimit të një video-je në rrjete sociale, në të cilën shfaqet një drejtues motomjeti, duke kryer një manovër të rrezikshme për veten dhe për përdoruesit e tjerë të rrugës, në aksin rrugor “Fushë Milot – Thumanë”, u bë identifikimi i shtetasit D. Sh., 40 vjeç, banues në Tiranë, si dhe ndëshkimi i tij me masë administrative 20 000 lekë të rinj, për shkelje të pikave 2 dhe 3, të nenit 139 të Kodit Rrugor.
Drejtoria Vendore e Policisë Lezhë falënderon qytetarët për denoncimet dhe i fton ata që të vijojnë të denoncojnë çdo rast të paligjshmërive, në Komisariatin Dixhital apo në numrin pa pagesë 112, duke iu garantuar reagim të shpejtë, profesional dhe të paanshëm. Gjithashtu, Policia Rrugore e Lezhës apelon për të gjithë përdoruesit e rrugës, që të respektojnë rregullat e qarkullimit rrugor, me qëllim parandalimin e aksidenteve./albeu.com/
