Ministria e Financave: Asnjë pikë karburanti nuk do shesë më me pompa manuale
Për shkak të abuzimeve të shumta me pompat manuale, Ministria e Financave ka urdhëruar përdorimin ekskluziv të regjimit automatik të tregtimit të karburanteve sipas parimit “Pa kupon tatimor, s’ka karburant”!

Urdhri mban firmën e Ministrit Arben Ahmetaj dhe i kërkon Tatimeve e Doganave nisjen urgjent të kontrolleve me qëllim verifikimin se sistemi i monitorimit të tregut të karburanteve funksionon nën regjimin automatik.

Pompat manuale supozohet të përdoren nga kompanitë e furnizimit vetëm kur sistemi pëson defekt, apo në rastet kur mungon furnizimi me energji elektrike.

Urdhri vlen edhe për ato pompa, kasat e të cilave nuk rezultojnë ende të lidhura me serverin e tatimeve, por e raportojnë xhiron ditore në fund të ditës.

Burime pranë Ministrisë së Financave thanë për Report TV se Ahmetaj ka kërkuar masa të rrepta ndëshkuese për shkeljet e evidetuara, të cilat sipas legjislacionit në fuqi, përfshijnë konfiskim të mallit, deri bllokim të aktivitetit apo ndjekje penale. /albeu.com/
Shtuar më 15/01/2017, ora 13:49
Shkruani komentin tuaj!
Të fundit nga kjo kategori