Meta takon Boutaris: Faleminderit për mbështetjen ndaj shqiptarëve
Pëlqej
Kryetari i Kuvendit z. Ilir Meta priti sot Kryetarin e Bashkisë së Selanikut z. Yiannis Boutaris të cilin e uroi për marrjen e mandatit të dytë, duke vlerësuar njëkohësisht rolin e tij pozitiv në menaxhimin e qytetit fqinj bregdetar si dhe mbështetjen e pakursyer ndaj komunitetit domethënës shqiptar në Selanik dhe në rrethinat e tij. Z. Meta u shpreh se komuniteti shqiptar në Greqi dhe minoriteti grek në Shqipëri përfaqësojnë një urë solide të miqësisë tradicionale dhe bashkëpunimit të fortë mes dy vendeve fqinje.

Z. Meta e përgëzoi z. Boutaris për marrëveshjen e binjakëzimit mes qyteteve të Selanikut dhe Durrësit duke vënë në dukje se këto dy qytete të rëndësishme janë porta hyrëse të investimeve të huaja në të gjithë rajonin e Ballkanit. Në këtë kuadër, z. Meta theksoi se bashkëpunimi mes dy vendeve dhe veçanërisht ai ndërkufitar duhet forcuar më tej.

Kryetari i Bashkisë së Selanikut z. Yiannis Boutaris shprehu kënaqësinë për vizitën e tij në Shqipëri duke nënvizuar se Greqia, dhe në veçanti Selaniku e vlerëson praninë dhe kontributin pozitiv të komunitetit shqiptar në Greqi, komunitet për të cilin duhet bërë më shumë në të ardhmen.
Z. Boutaris theksoi se bashkëpunimi, dashuria dhe miqësia mes popujve fillon së pari nga kontaktet mes qyteteve, dhe në këtë kuadër duhen shtuar kontaktet mes komuniteteve të biznesit si dhe të intensifikohen shkëmbimet kulturore.

Në përfundim, z. Meta dhe z. Boutaris ndanë bindjen se duhen shtuar përpjekjet për forcimin e mëtejshëm të bashkëpunimit ekonomik e tregtar si dhe për përmirësimin e lidhjeve infrastrukturore në shërbim të afrimit të mëtejshëm të lidhjeve mes dy popujve fqinj.
Shtuar më 23/09/2014, ora 15:32
Shkruani komentin tuaj!
Të fundit nga kjo kategori