Më 17 nëntor pritet të miratohet “Rezoluta e pavarësisë”
Albeu.com
Sipas njoftimit nga takimi, kryetarët e grupeve parlamentare si dhe kryetari i Komisionit për BANIE, kanë mbajtur qëndrimin se teksti i Rezolutës është marrë me konsensus të plotë dhe se Rezoluta për konfirmimin e shpalljes së Kosovës - shtet të pavarur dhe sovran, në bazë të vullnetit të popullit, duhet të miratohet në Kuvend, në seancën e 17 nëntorit.Fakti që për datën 17 nëntor është paralajmëruar miratimi i "Rezolutës për rikonfirmimin e vullnetit të popullit të Kosovës për pavarësi", ndërkaq ende nuk ishte e qartë se si do të duket teksti final i kësaj rezolute, ka qenë arsye e mjaftueshme për një takim të kryetarit të Kuvendit të Kosovës, akademik Nexhat Daci dhe të anëtarëve të Kryesisë me shefat e grupeve parlamentare dhe me anëtarët e Komisionit për Çështje Juridike, Legjislacion dhe Kornizë Kushtetuese dhe të Komisionit për Bashkëpunim Ndërkombëtar dhe Integrime Euroatlantike.

Sipas njoftimit nga takimi, kryetarët e grupeve parlamentare: Alush Gashi, Jakup Krasniqi, Gjylnaze Syla, Teuta Sahatqija e Mahir Yagcilar si dhe kryetari i Komisionit për Bashkëpunim Ndërkombëtar dhe Integrime Euroatlantike, Sabri Hamiti, kanë mbajtur qëndrimin të fortë se teksti i Rezolutës, i nënshkruar nga ata është punë e kryer, se vendimi është marrë me konsensus të plotë dhe se Rezoluta për konfirmimin e shpalljes së Kosovës - shtet të pavarur dhe sovran, në bazë të vullnetit të popullit, duhet të miratohet në Kuvend, në seancën e 17 nëntorit. Këtë e kanë mbështetur edhe shumica pjesëmarrësve në këtë takim, por ka pasur edhe vërejtje përmbajtësore për tekstin e nënshkruar. Kryetari i Komisionit Parlamentar për Çështje Juridike, Legjislacion dhe Kornizë Kushtetuese, Hydajet Hyseni, ka rikujtuar se propozimi i komisionit, të cilin e udhëheq, që në pikën e parë të Rezolutës të theksohet konfirmimi i vullnetit të popullit të Kosovës për pavarësi (në vend të konfirmimit të shpalljes së pavarësisë) nuk ishte gabim, por ishte pikërisht përmirësim gabimi. Ai, ndërkaq, ka theksuar se shumëçka duhet të riformulohet në tekstin e Rezolutës. Komisioni për Legjislacion ka vazhduar mbledhjen, sipas sugjerimit të kreut të legjislativit të vendit, por disa nga anëtarët e tij, paraprakisht, kanë pohuar se e shohin të tepërt këtë takim, duke theksuar se ata me kohë e kanë pranuar tekstin e nënshkruar nga shefat e grupeve parlamentare. Pasi që nuk janë përfillur vërejtjet e tij për tekstin e Rezolutës, deputeti Hydajet Hyseni, u ka thënë pjesëmarrësve në mbledhje se do të japë dorëheqje nga posti i kryetarit të Komisionit për Çështje Juridike, Legjislacion dhe Kornizë Kushtetuese. rtk
Shtuar më 10/11/2005, ora 21:08
Tage: arkiv

Shkruani komentin tuaj!
Të fundit nga kjo kategori