Sulm në Norvergji, autori i armatosur rrëmben auto ambulancën dhe shtyp këmbësorët
Mazhoranca rrëzon hetimin e Berishës, i ikin 8 deputetë
Albeu.com
Shumica ka votuar dje kundër hetimit të pasurisë së kryeministrit, por vetëm me 67 vota. Tetë deputetë nga aleatët votojnë pro, abstenojnë ose nuk marrin pjesë në votim.Kompaktësia e votave të maxhorancës ka pësuar dje një tjetër goditje në seancën plenare, kur u votua kërkesa e opozitës për ngritjen e komisionit hetimor që do të hetonte pasurinë e kryeministri Sali Berisha dhe të familjarëve të tij. Të djathtët kanë arritur të kenë unike vetëm 67 vota, pra një numër i ulët ky krahasuar me numrat që duhet të ketë realisht koalicioni i djathtë, duke rrëzuar nëpërmjet tyre kërkesën e socialistëve për të hetuar kryeministrin Berisha. Ndërkaq, vetëm 2 vota ishin në mbështetje të ngritjes së komisionit në fjalë, vota e Nard Ndokës, pra edhe ky deputet i koalicionit e kryetar i PDK-së, si dhe i kreut të grupit parlamentar të PS-së, Pandeli Majko, i vetmi nga deputetët e majtë që mori pjesë në procesin e votimit. Nga maxhoranca dje kanë “firuar” plot tetë deputetë, të cilët nuk qenë rreshtuar me shumicën për të kundërshtuar hetimin e pasurisë së Berishës. Kështu, kanë abstenuar gjatë votimit katër përfaqësues të tjerë nga radhët e maxhorancës, Vangjel Dule, Spiro Peçi, Tritan Shehu dhe Ymer Tola. Përkatësisht, 50 deputetë të pranishëm në sallë nuk votuan, përfshirë edhe tre deputetët e shumicës, Spartak Ngjela, Leonard Solis dhe Nikollaq Neranxi. Ngjela, gjatë debateve që u zhvilluan para votimit, tha se, nëse do të rrëzohej kërkesa e opozitës për hetimin e kryeministrit, ky parlament nuk vlente më e nuk kishte asnjë lidhje me demokracinë liberale. Ndërsa Nard Ndoka, duke shpjeguar votën e tij pro ngritjes së komisionit, tha se maxhoranca po shkelte Kushtetutën, duke hedhur poshtë një kërkesë të ligjshme të opozitës. Kreu i ligjvënësve të PS-së, Majko, gjatë diskutimeve për miratimin e kalendarit të punimeve, duke iu drejtuar të gjithë deputetëve të shumicës, u kërkoi të votonin këtë kërkesë, pasi ishte një kërkesë e ardhur nga ¼ e deputetëve të kësaj salle. Nga ana tjetër, kryetarja Topalli, duke u kujtuar deputetëve të maxhorancës se debati për këtë çështje ishte mbyllur, tha se tashmë ishte ngritur një komision hetimor që do të hetojë për pasuritë e të gjithë zyrtarëve. Por kreu i deputetëve të LSI-së, Sabit Brokaj, e konsideroi qëndrimin e Topallit agresiv e të njëanshëm. Sipas tij, një parlament që shkel Kushtetutën nuk mund të jetojë gjatë. “Dikur kam dëgjuar një ish-të burgosur që thoshte se regjimin nga demokracia e ndan urdhri. Ngrijeni komisionin sepse këtë jua kërkojnë 35 deputetë, ¼ e Kuvendit, siç e kërkon rregullorja e Kushtetuta. Unë e ftoj opozitën të vijë këtu në podium se po shkelet hapur Kushtetuta edhe rregullorja. Ty, kryetare, po të japim një libër, Kushtetutën, se nuk e di mirë”, - tha Majko, ndërsa kryetarja Topalli po vazhdonte procesin e votimit që u mbyll me mosmiratimin e kërkesës së socialistëve. Pas votimit, të gjithë deputetët e opozitës janë ngritur nga vendet e tyre, duke qëndruar në këmbë pranë podiumit parlamentar, në shenjë proteste për vendimin e marrë nga maxhoranca nëpërmjet votave. Radha e gardistëve, e vendosur midis deputetëve të opozitës dhe vendeve ku qëndrojnë ministrat e qeverisë, ka mbajtur situatën nën kontroll që duhet thënë se ndryshe nga ndonjë rast tjetër nuk është agravuar në veprime të tjera, përveç qëndrimit në këmbë. Nënkryetari i grupit të PS-së, Petro Koçi, tha se votimi i maxhorancës ishte mbrojtje e hapur për korrupsionin.

Rezultati i votimit:
67 kundër
2 pro
4 abstenime
50 nuk morën pjesë

Abstenuan nga maxhoranca:
Spiro Peçi
Tritan Shehu
Vangjel Dule
Ymer Tola

Nuk morën pjesë nga e djathta
Spartak Ngjela
Leonard Solis
Nikollaq Neranxi

Votoi pro komisionit
Nard Ndoka

nga Anila Rama, Shekulli
Shtuar më 28/09/2006, ora 12:54
Tage: arkiv
Shkruani komentin tuaj!
Të fundit nga kjo kategori