Pallati që “çoi” Dakon pas hekurave është 11 kate, studimi ishte bërë për 7 (DOKUMENTI)

Ish-kryebashkiaku i Durrësit, Vangjush Dako u arrestua me urdhër të SPAK më 6 qershor. Ai akuzohet se ka shkelur detyrën për një pallat 11 katësh që ka ndërtuar shtesë pa leje si dhe për një tender për rërën në plazhin e Currilave.

Ndaj tij zyrtarisht rëndojnë akuzat për ‘Shpërdorim detyre’ dhe ‘Falsifikim dokumentesh’.

Subjekti ka realizuar një studim sizmik në vitin 2013, pra një vit pasi kishte përfunduar ndërtimi dhe rezultoi se studimi ishte bërë për objekt 7 katësh dhe jo 11 katësh sa ishte ndërtesa realisht.

Sipas një dokumneti të publikuar nga Inside Story, pas studimeve ka rezultuar se pallati  është ndërtuar mbi një territor, pa ditur më parë kushtet sizmologjike.

Nga sa më sipër, të gjithë personat që i kanë nënshkruar konkretisht aktin e piketimit të strukturës, arkitektja Meri Priftuli, administrator shtetasi Fiqiri Farruku, inxhinieri topograf Ardian Bulku, inxhinieri topograf i bashkisë Fatmir Ejupi dhe drejtori i urbanistikës Adhurim Qehajaj, si dhe personat që kanë nënshkruar aktin e kontrollit të përfundimit të themelit së bashku me mbikëqyrësin e punimeve Shaban Karuli, kanë konsumuar në bashkëpunim elementët e figurës së veprës penale të “falsifikimi i vulave, stampave ose i formularëve”, është cituar në dosjen hetimore.

Prokurorët e SPAK dyshojnë se të gjitha këto procedura janë kryer fiktivisht, vetëm për t’i hapur rrugë regjistrimit ligjor të këtij objekti në Kadastër.


Shtuar 14.06.2023 22:00