Llogari bankare dhe pasuri të paluajtshme, policia bën “kërdinë” në Vlorë
Policia e Vlorës ka sekuestruar disa pasuri të paluajtshme dhe llogari bankare prej 500 mijë eurosh pasi dyshohet se janë siguruar nga pastrimi i produkteve të veprimtarisë kriminale.

Keto pasuri janë në pronësi të Luan Beshaj i cili ka qenë i dënuar më parë në Itali për trafikim narkotikësh.

Njoftimi i Policisë

Sekuestro preventive mbi disa pasuri me vlerë rreth 500 000 euro, që dyshohen se janë përfituar nga veprimtaria kriminale e pastrimit të parave.

Në vijim të punës për gjurmimin, evidentimin dhe sekuestrimin e pasurive të përfituara nga veprimtaria kriminale, si dhe në kuadër të procedimit penal të nisur prej vitit 2014, Seksioni për Hetimin e Krimit Ekonomik e Financiar pranë Drejtorisë Vendore të Policisë Vlorë, në bashkëpunim me Prokurorinë e Vlorës, bënë zbatimin e vendimit penal të Gjykatës së Shkallës së Parë Vlorë, për vendosjen e sekuestros preventive mbi disa pasuri dhe objekte, si më poshtë:

2 apartamente banimi në Vlorë dhe Orikum;
1 pemishte në Radhimë;
2 automjete;
2 llogari bankare;
Vlera financiare e këtyre pasurive kap shifrën rreth 500 000 euro.

Këto sekuestrime pasurore janë në kuadër të procedimit penal proaktiv të vitit 2014, ndaj shtetasit L. B., si person i dyshuar për kryerjen e veprës penale “Pastrimi i produkteve të veprës penale ose veprimtarisë kriminale”.

Ky shtetas ka qenë i dënuar në Itali, për veprën penale “Trafikim narkotikësh” dhe dyshohet se këto pasuri i ka ngritur mbi bazën e këtyre veprimtarive të paligjshme.

Veprimet e tjera procedurale vijojnë nga Prokuroria pranë Gjykatës së Shkallës së Parë Vlorë”.
Shtuar më 06/12/2019, ora 09:31

Shkruani komentin tuaj!
Të fundit nga kjo kategori