Lleshi flet për njohjen me kreun e PS-së
Sandër Lleshi, i emëruar dje nga Edi Rama si këshilltar i tij për çështjet e mbrojtjes flet për njohjen me kreun e PS-së, ndërmjetësimin e Ismail Kadaresë dhe propozimin e tij nga shkrimtari i njohur si kandidat për President një vit më parë.

Në një intervistë për gazetën Panorama, Lleshi shprehet e se e pranoi propozimin për arsye se programi politik i zotit Rama dhe i qeverisë së tij ofronte një model të ri për zhvillimin e vendit në tërësi.


"Në fakt ka pasur vetëm një takim nga mesi i muajit korrik me zotin Rama ku ai më ka kërkuar që të kryej detyrën e këshilltarit të tij për çështjet e mbrojtjes. Sigurisht që propozimin e kam vlerësuar dhe e konsideroj një besim të lartë që më drejtohet mua personalisht, por përmes meje jo vetëm mua, pasi unë e ndaj si një vlerësim me të gjithë ushtarakët e Forcave të Armatosura, të atyre njerëzve që i kanë dhënë këtij vendi një shërbim shumë të madh. Pra, vlerësimin nuk e mbaj personal, por e ndaj me shumë ushtarakë të FA. E kam pranuar propozimin për arsye se besoj që programi politik i zotit Rama dhe i qeverisë së tij tashmë ofron një model të ri për zhvillimin e vendit në tërësi, por dhe një qasje të re për sigurinë kombëtare dhe mbrojtjen e vendit. Duke qenë se te ky program kam parë hapësirën ku unë mund të bashkoj kontributin tim, atëherë e kam pranuar me shumë kënaqësi dhe me vlerësim këtë ftesë të zotit Rama" shprehet Lleshi.

LLeshi shprehet optimist për emërimin e zonjës Mimi Kodheli në postin e ministres së Mbrojtjes. /albeu.com/
Shtuar më 24/08/2013, ora 11:29

Shkruani komentin tuaj!
Të fundit nga kjo kategori