"Lamtumirë mik dhe koleg!": Mesazhe prekëse në kujtim të mjekut Drini Dobi
Mbrëmjen e djeshme mjeku neurolog Drini Dodi ndërroi jetë në Itali si pasojë e inektimit me koronavirus.

Lajmi preku edhe shumë kolegë të mjekut të cilët shprehën ngushëllimet në mediat sociale duke vlerësuar rolin e tij në fushën e mjekësisë në vend.

Kreu i Urgjencës Skënder Brataj, në një shënim në mediat sociale shprehet se ndihet i trishtuar, ndërkohë që shpresonte në shpëtimin e tij por kjo flamë e mundi.

Në mediat sociale ka reaguar edhe mjeku infeksionist Tritan Kalo i cili i ka shprehur ngushëllime bashkëshortes së Drini Dobit, fëmijëve dhe të afërmve të tij.

Kalo shprehet se mjeku Drini Dobi ose ‘drini i Bardhë i Gjirokastrës’ siç e quan ai ofroi mirësi dhe shpresë për dhjetëra vite në shërbim ndaj të sëmurëve.

Skënder Brataj: Të dëgjosh humbjen e jetës së Dr. Drinit në emision televiziv! Jo, kurrë në asnjë vend dhe në asnjë moment nuk doja ta dëgjoja Drini Dobi këtë lajm të kobshëm.

O sa trishtim, o sa na lëndove Drini, o sa shpresuam të të shpëtonim! Kjo flamë të mundi, ty njeriun e pa përtuar, të mori se i duhesh edhe atje lart.

Ti që ato vite të vështira të fakultetit i kaloje në sallën e leksioneve deri në mesnatë duke studjuar, ti që student mbete gjithë jetën, ti që ishte nga më të mirët e neurologëve në Shqipëri dhe në botë, ike kështu pa pritur, kaq i ri, pa zhurmë e bujë.

Ti njeri i punës , i familjes dhe shoqërisë. Ti që u merakose aq shumë për bashkëshorten tënde kur u sëmur, i ndejte pranë derisa u shërua. Ti që më telefonoje ato ditë të tmerrshme marsi kur unë u sëmura dhe më jepje kurajo dhe këshilla mjeksore, më jepje besim dhe ishe i gatshëm për çdo ndihmë.

Kur u ndodha në konferencën e parë të urgjencës mjeksore në Tiranë nuk e dija kush ishte referuesi i radhës. Rastësisht pashë emrin tënd sipas programit dhe të prezantova siç të kujtoja student.

Kisha 22 vite pa të takuar, pa e ditur si ishin ndarë rrugët e jetës. Më gëzove shumë atë ditë që u ritakuam. Ishe bërë ai specialisti i spikatur, i urtë, i qetë dhe shumë i ditur.

Sot, pas shtatë vjetësh nga ajo ditë, ti nuk je më midis nesh. Drini kam dëgjuar koleg, qytetar apo çdo person tjetër në këto vite kur flitej për neurolog shqipëtar. Sapo dëgjonin emrin tënd, veç fjalë zemre flisnin. Normal që ato do të dëgjoja, se ato kishe lënë në kujtesën time, në kujtesën e brezit tonë.

Mik, shok, koleg, është hera e parë që për ty nuk kam fjalë! Është hera e parë që për ty kam vetëm lot që nuk do të doja ti kisha kurrë! Na mbro nga aty lart, se thonë që zoti më të mirët i do për vete! Lamtumirë !

Reagimi i Tritan Kalos: “Kohë Kovidiane….9.12.2020….Dr. DRINI DOBI, drini i bardhë i Gjirokastrës së hirtë e të gurtë, një Mantelbardhë që ofroj mirësi dhe shpresë për dhjetra vite në shërbim ndaj të sëmurëve, u shkëput sot nga rradhët Armatës së Kujdedhënësve për të sëmurët Shqiptarë, për t’u ngjitur lart drejt Përjetësisë.…NUK mundi të triumfojë në përballjen e tij me sfidën e shekullit, infeksionin nga Sars-Cov2/Covid-19…..Mjeku i përkorë, babai i devotshëm, miku e shoku i mijra prej nesh, i Mjekëve Shqiptarë që japim në çdo kohë shumë nga vetja jonë, nga jeta jonë vetëm e vetëm për të mbajtur në jetë me mijra të sëmurë, të cilët kanë besim në PUNËN, PËRKUSHTIMIN dhe PROFESIONALIZMIN tonë….Të qoftë i lehtë dheu i kësaj toke Dr. Drini Dobi!!!….Ngushëllime gruas, fëmijve dhe të afërmve të tij, të cilët kurdoherë kanë dhe do të gjejnë në gjithkënd nga ne Mantelbardhët Shqiptarë, bujarinë, mirësinë, dashurinë dhe përkujdesin ndaj tyre, në mungesë të DRINIT të tyre të dashur!!!….Lamtumirë mik e koleg,” shkruan Kalo në postimin e tij.
Shtuar më 10/12/2020, ora 08:51

Shkruani komentin tuaj!
Të fundit nga kjo kategori