Shkelje të rënda, shkarkohet nga detyra drejtori i Policisë së Burgjeve
Pas disa largimeve në Drejtorinë e PërgjithshmeBurgjeve që përfunduan edhe me arrestimin e ish-Drejtorit Artur Zoto, një tjetër drejtues i lartë i këtij institucioni është shkarkuar.

Ministri i Drejtësisë Petrit Vasili, ka firmosur dje shkarkimin nga detyra të Petrit Koshaj, me detyrë Drejtor i Policisë së Burgjeve në Drejtorinë e PërgjithshmeBurgjeve.

Mësohet se motivacioni i shkarkimit ka qenë për shkelje të rënda dhe se shkarkimi është përgatitur disa ditë më parë pas disa kontrolleve të ushtruara.

Koshaj u prezantua më 17 dhjetor 2015 nga Ministri i Drejtësisë i atëhershëm Ylli Manjani dhe Artur Zoto.


Kush është Petrit Koshaj

Petrit Koshaj ka kryer Shkollën e Mesme Ushtarake “Skënderbej” dhe më pas, ka studiuar pranë Akademisë Ushtarake, dega Zbulim.

Është trajnuar në fushën e policisë, si për luftën kundër terrorizmit në USA dhe në Rumani, për shërbimet e policisë dhe VIP Protection në Izrael dhe Angli etj.

Pas viteve ’90 ka punuar në Ministrinë e Brendshme me detyra të ndryshme dhe si pjesë e Forcave Speciale Renea.

Në vitin 1998 ka mbajtur detyra të ndryshme pranë Drejtorisë së Shoqërimit të Personaliteteve, deri edhe drejtimin e këtij institucioni së fundmi. Ai ka një eksperiencë prej më shumë se 25 vitesh në struktura të ndryshme të policisë së shtetit.

Zotëron shumë mirë gjuhën angleze dhe disa gjuhë të tjera. Petrit Koshaj është 55 vjeç, ka lindur në Vlorë dhe banon në Tiranë. /albeu.com/
Shtuar më 28/03/2017, ora 10:52

Shkruani komentin tuaj!
Të fundit nga kjo kategori