Kur reforma kthehet ne komedi; nxenesit ne Likove, kompjuteret ne Kumanove
Albeu.com
Projekti “Kompjuter për çdo fëmijë” jo vetëm që s’ka mbërritur të zbatohet ende nëpër komunat shqiptare, sikurse ajo e Likovës, por në këtë pjesë të Maqedonisë nxënësve u mungojnë edhe kabinetet e informatikës. Filloristët dhe nxënësit e shkollës së mesme, në Likovë, ndajnë një kabinet informatike edhe pse kjo lëndë është e obligueshme. Rreth 500 nxënës të paraleleve të disperzuara të gjimnazit “Goce Dellçev” dhe shkollës së mesme të bujqësisë “Kiro Burnaz” të Kumanovës, duhet të shkojnë në objektin e shkollës fillore “Ditura” të Komunës së Likovës, nëse dëshirojnë të punojnë me kompjuter. “Dyshoj se shkolla amë e Kumanovës i mban edhe kompjuterët e nxënësve tanë, pasi ‘Goce Dellçev’ është përplot kompjuterë, kurse nxënësit edhe për lëndën e informatikës duhet të shkojnë në shkollën fillore, 200 metra larg objektit të gjimnazit”, Avdi Alia, përgjegjës i paraleleve të disperzuara të gjimnazit, në Likovë. Ai, gjithashtu tregon se edhe kompjuterët e kabinetit të informatikës, në shkollën “Dituria”, nuk janë nga projekti “Kompjuterë për çdo fëmijë” por e projektit “e-school”, të realizuar gjashtë vite më parë, për përmirësimin e kushteve për mësimin e informatikës.
Ljubisha Nikoliç, drejtori i gjimnazit “Goce Dellçev”, thotë se nuk është ai fajtor që kompjuterët e nxënësve të Likovës kanë mbetur ende në Kumanovë. “Shpërndarjen e kompjuterëve nuk e bën shkolla por Ministria”, thotë Nikoliç, duke shtuar se në objektin e shkollës amë, në Kumanovë, rruhet edhe sasia e kompjuterëve të dedikuara për paralelet e Likovës. “Në shkollën amë nuk kemi më nevojë për kompjuterë, pasi me dërgesat që na ka bërë MASH janë plotësuar kërkesat e shkollës”, pohon ai. Sipas drejtorit, kur MASH filloi të ndan kontingjentin e “kompjuterë për çdo fëmijë”, ishte vendosur që prej sasisë të dërguar një klasë me kompjuterë të montohet në ish-objektin e “ZIK”-ut, në Kumanovë, ku mësojnë rreth 40 paralelet shqiptare të gjimnazit “Goce Dellçev” dhe një klasë tjetër në objektin e shkollës së mesme në Likovë, ku mësojnë 14 paralele të atij gjimnazi. Tani që, prej para tri - katër muajve në gjimnazin e Likovës është përforcuar edhe rryma elektrike, drejtori Nikoliç, pohon se kompjuterët do të montohen gjatë ditëve të pushimit, pasi, deri tani shkaku kërkohej tek rryma. “Kompjuterët për paralelet e Likovës i kemi në shkolë, të pa përdoruar dhe do ti montojmë gjatë ditëve të pushimit”, thotë Nikoliç. Në shkollën amë në Kumanovë, sikurse pohon ai, ruhen 35 kompjuterë për shkollën e Likovës, kurse thotë se për këtu Ministria do të duhet të ndan edhe po kaq kompjuterë të tepër, për kabinetin e arsimtarëve. Përgjegjësi Aliu, nuk është shumë optimist se në gjysmëvjetorin e dytë shkolla do të pajiset me 70 kompjuterë, Ai, madje, dyshon edhe në sinqeritetin e vizitës së paradokohshëm të ministrit Pero Stojanovskit, në shkollat e Likovës. “Ajo vizitë më tepër më dukeshe si një kamuflazh politik pra se qeveria vetëm nuk ju vret por u sjellën edhe libra”, shprehet Alia, përgjegjësi i paraleleve gjimnaz në Likovë. Gjatë kësaj vizite, ku merrte pjese edhe zëvendësministrja Lindita Qazimi, është diskutuar edhe mundësia për ndarjen e paraleleve në subjekt të veçantë juridik, ndërsa u shpërndanë edhe disa libra dhe lektura shkollore. (nga Laura Papraniku, Lajm)
Shtuar më 07/01/2009, ora 16:08
Tage: arkiv
Shkruani komentin tuaj!
Të fundit nga kjo kategori