KQZ kthen mbrapsht kandidaturën për Bashkinë e Himarës, reagon ashpër Athina zyrtare
Kreu i OMONIA-s, Fredi Beleri nuk është regjistruar dje nga Komisioni Qendror i Zgjedhjeve për të garuar si kandidat i pavarur për Bashkinë e Himarës.

Sipas KQZ, arsyeja është shkelja e ligjit të dekriminalizimit, pasi Beleri figuron i dënuar më parë nga Greqia por edhe në Shqipëri.

Fredi Beleri është dënuar në vitin 1999 nga Gjykata e Athinës me 18 muaj burg për armëmbajtje pa leje. Nga ky dënim, ai nuk ka kryer burg. Ndërsa në vitin 2006, Gjykata e Vlorës e ka dënuar me 3 vjet burg për thirrje urrejtjeje nacionaliste. Edhe për këtë vendim nuk ka kryer burg.

Këto janë arsyet që KQZ i ka refuzuar kandidimin por ka reaguar ashpër Athina zyrtare.

Ministria e Jashtme greke thotë se me shqetësim po ndjekim vendimin e KQZ-së që nuk pranoi kandidaturën e Kryetarit të Omonias për Himarën.

“Vendimi i Komisionit Qendror të Zgjedhjeve, i cila përbëhet nga anëtarë të partive shqiptare, për të mos pranuar kandidaturën e Kryetarit të Omonias Himarë, z. Fredi Beleri, për postin e Kryetarit të Bashkisë në zgjedhjet e ardhshme lokale shkakton shqetësim të veçantë.

Me aq sa janë bërë të ditura deri tani, ky vendim nuk ka bazë ligjore. Po ndjekim zhvillimet dhe jemi të gatshëm të ndihmojmë përfaqësuesit e minoritetit”, deklaron MPJ helene.

Shtuar më 18/05/2019, ora 10:34

Shkruani komentin tuaj!
Të fundit nga kjo kategori