Korrupsioni ne Shqiperi, FBI hetim 50 dosjeve
Albeu.com
FBI-ja merr në dorë dosjet e gjithë zyrtarëve shqiptarë që janë arrestuar për korrupsion. Në takimet e fundit, që kreu i policisë shqiptare ka pasur me krerët e FBI-së, i ka vënë në dispozicion gjithë operacionet e kryera për korrupsion.Sipas të dhënave, numërohen rreth 50 dosje të tilla gjatë një harku kohor prej dy vitesh, nga të cilët janë arrestuar 216 persona. Burimet policore bënë të ditur se për të gjithë këta persona janë ngritur akuzat e vjedhjes ose mitëmarrjes, duke shpërdoruar detyrën. Nga ana tjetër, gjatë dy viteve rezulton se Gjykata e Tiranës ka dënuar 26 persona për të njëjtat akuza.

Sipas informacioneve zyrtare, duke nisur nga shtatori i vitit 2005, e deri në shtatorin e këtij viti, Drejtoria e Përgjithshme e Policisë së Shtetit ka realizuar 50 operacione antikorrupsion. Burimet nga uniformat blu shpjegojnë se këto operacione janë organizuar në të gjithë qarqet e vendit dhe kanë sjellë arrestimin e 216 personave. Të gjitha këto të dhëna janë dërguar tashmë edhe në Shtetet e Bashkuara të Amerikës. Drejtori i Përgjithshëm i Policisë së Shtetit, Ahmet Prençi, gjatë ditëve që ka qëndruar në SHBA ka pasur një sërë takimesh edhe me krerët e FBI-së. Sipas të dhënave, gjatë këtyre takimeve, veç të tjerash, i ka njohur homologët për punën e bërë të policisë në disa sektorë, e kryesisht në luftën kundër korrupsionit. Rasti më i rëndësishëm ka qenë ai i ndalimit të nëntë personave, ndër të cilët ishte edhe zëvendësministri i Transporteve, Nikolin Jaka. Prençi ka treguar listën e të gjithë të arrestuarve, ku pjesa dërrmuese i përket vitit 2006. Sipas të dhënave, kjo është bërë në kuadër të bashkëpunimit të policisë shqiptare me FBI-në. Kjo e fundit ka qenë tejet e interesuar në rajonin tonë, ku ka hapur disa zyra, si në Kosovë, Maqedoni, Shqipëri etj. Nga ana tjetër, veç listës së arrestimeve renditen edhe të gjithë zyrtarët e dënuar gjatë këtyre dy viteve. Për dy vitet e fundit, nga gjykata kanë marrë masën e dënimit 26 zyrtarë. Numrin më të madh të tyre e mbajnë punonjësit që kanë marrë dënimin me gjobë dhe ata që kanë përfunduar në qeli kanë një numër të vogël. Sipas të dhënave zyrtare, ata janë akuzuar për shpërdorim detyre ose mitëmarrje. Janë 26 zyrtarë, të cilët tashmë dosja e tyre nuk ndodhet në prokurori, por në gjykatë. Të gjithë kanë marrë një vendim të formës së prerë. Janë dënuar për akuzën e vendosur nga institucionet shtetërore. Kontrollet e KLSH-së në institucionin ku ata kanë punuar më parë i kanë nxjerrë abuzues me detyrën shtetërore. Kjo, pasi neglizhenca e tyre ka shkaktuar dëmin ekonomik. Më pas, dosja e tyre është dërguar në organin e akuzës. Hetimi i prokurorisë ka nxjerrë të akuzuarit fajtorë, me akuzën e shpërdorimit të detyrës, duke e dërguar çështjen e tyre në gjykatë. Më pas, ky organ ka dhënë edhe dënimin e duhur për zyrtarët e akuzuar për shpërdorim detyre, korrupsion apo mitëmarrje. Ndërkohë, gjatë kohëve të fundit, Policia e Shtetit ka kryer edhe një sërë operacionesh antikorrupsion, ndër të cilët, më të rëndësishmit kanë qenë "Gjoba e fundit" dhe "Duart e pastra". Siç dihet, në operacionin e parë u arrestuan disa efektivë të policisë tatimore, deri te drejtori i tyre, ndërsa në operacionin e dytë u arrestuan disa zyrtarë të Ministrisë së Transporteve. Këto operacione u realizuan edhe në bashkëpunim me Task-Forcën, e cila ka pasur bashkëpunimin e ngushtë të specialistëve të FBI-së.


Vendimet


Shpeshherë, togat e zeza japin dënime vetëm me gjobë


Arrestimet më të bujshme dhe "shfryrja" në gjykatë



Arrestimet e bujshme për korrupsion, në të shumtën e rasteve janë zbehur në gjykatë. Shumë zyrtarë kanë fituar pafajësi, ndërsa të tjerët kanë marrë vendime për dënime të lehta. Dënimi më i madh që është dhënë deri tani për një zyrtar, është ai i ish-kryetarit të Kthimit të Pronave në Durrës, Vasil Hilës. Me 20 vjet heqje lirie është dënuar ish-zyrtari nga Gjykata e Shkallës së Parë të qytetit bregdetar për akuzat e falsifikimit, korrupsionit dhe shpërdorimit të detyrës. Por ky dënim nuk është kryer deri në fund, pasi Gjykata e Apelit në këtë qytet e ka lënë të lirë, duke i hedhur poshtë të gjitha akuzat që kishte Hila. Por, një dënim me 6 vjet heqje lirie ka marrë edhe ish-kryekomunari i Golemit, Demir Lika. Nuk është lënë pas as ish-drejtoresha e Postës Shqiptare, Luiza Hoxhaj, e cila më pas është lënë e lirë. Gjithashtu dhe ish-punonjësit e policisë nuk i kanë shpëtuar hekurave të qelisë, edhe pse me një dënim të vogël ata kanë qëndruar atje. Nga ana tjetër, nga informacionet zyrtare vihet re se dënimi me gjobë është më i përhapur në vendimet e gjykatës për zyrtarët apo ish-zyrtarët, siç "emërohen" kur largohen nga administrata. Nga 26 zyrtarë të dënuar, numrin më të madh të tyre e zënë ata që janë dënuar me gjobë. Kjo vjen edhe pas kërkesës së prokurorisë. Madje, burime nga ky institucion bën të ditur se gjoba kalon në favor të shtetit, ndërkohë dënimi me burg, përveç se i kushton shtetit, nuk sjell asnjë përfitim. Ble. Gi.


Zyrtarët e dënuar

1. Perlat Kojdheli, polic në Komisariatin e Vlorës, akuzohet për shpërdorim detyre, dënohet me 1 vit burg më 30 shtator të 2005-ës

2. Vasil Hila, kryetar i Komitetit të Kthimit dhe Kompensimit të Pronave në Durrës, akuzohet për falsifikim, shpërdorim detyre, vjedhje duke shpërdoruar detyrën, dënohet me 20 vjet burg më 13 maj 2005, më pas lihet i lirë

3. Ediliano Bisha, shef i grupit të gatshëm të Komisariatit Nr. 1 Tiranë, është akuzuar për mitëmarrje, dënohet më 28 qershor të 2005-ës me 18 muaj heqje lirie

4. Tefta Dosti, (shefe finance në trajtimin e studentëve në Qytetin Studenti), akuzohet për korrupsion dënohet me gjobë në vitin 2006

5. Arta Tani, punonjëse në Ministrinë e Arsimit dhe Shkencës, akuzohet për shpërdorim detyre, dënohet me gjobë në vitin 2006

6. Vehbi Mancaku, punonjës i Komunës Paskuqan, akuzohet për shpërdorim detyre, dënohet me gjobë në vitin 2006

7. Xhelil Fezga, punonjës i Komunës Paskuqan, akuzohet për shpërdorim detyre, dënohet me gjobë në vitin 2006

8. Naim Baçi, punonjës i Komunës Paskuqan, akuzohet për shpërdorim detyre, dënohet me gjobë në vitin 2006

9. Lezan Molla, punonjës i Komunës Paskuqan, akuzohet për shpërdorim detyre, dënohet me gjobë në vitin 2006

10. Nexhmie Dushi, faturiste e KESH-it në Tiranë, akuzohet për korrupsion, dënohet me gjobë në vitin 2006

11. Seit Duçka, elektricist i KESH-it në Tiranë, akuzohet për korrupsion, dënohet me gjobë në vitin 2006

12. Ylvi Saliaj, zëvendësdrejtor i përgjithshëm i Albtelekomit, akuzohet për shpërdorim detyre, dënohet me gjobë në vitin 2006

13. Bledar Shanaj, drejtor i Drejtorisë Ekonomike në Albtelekom, akuzohet për shpërdorim detyre, dënohet me gjobë në vitin 2006

14. Fejzi Petoshati, drejtor i Ndërmarrjes së Shpërndarjes së Librit Shkollor, akuzohet për shpërdorim detyre dhe shkelje të barazisë në tendera, dënohet me gjobë në vitin 2006

15. Arben Kujoska, punonjës në Ministrinë e Arsimit dhe Shkencës, akuzohet për shpërdorim detyre dhe dënohet me gjobë në vitin 2006

16. Sokol Turani, punonjës në Ministrinë e Arsimit dhe Shkencës, akuzohet për shpërdorim detyre dhe dënohet me gjobë në vitin 2006

17. Qerim Ribaj, punonjës në Ministrinë e Arsimit dhe Shkencës, akuzohet për shpërdorim detyre dhe dënohet me gjobë në vitin 2006

18. Dafina Cenaj, punonjëse në Ministrinë e Arsimit dhe Shkencës, akuzohet për shpërdorim detyre dhe dënohet me gjobë në vitin 2006

19. Kujtim Bilaj, punonjës në Ministrinë e Arsimit dhe Shkencës, akuzohet për shpërdorim detyre dhe dënohet me gjobë në vitin 2006

20. Tonin Burgaj, punonjës në Komunën Kastrat në Malësi të Madhe, akuzohet për shpërdorim detyre dhe dënohet me 6 muaj burg e 300 mijë lekë gjobë më 5 dhjetor të 2006-ës

21. Luiza Hoxha, ish-drejtoresha e përgjithshme e Postës Shqiptare, akuzohet për shpërdorim detyre dhe vjedhje, dënohet me një vit burg dhe 700 mijë lekë gjobë. Lihet e lirë më 19 dhjetor 2006

22. Arben Golemi, ish-drejtori i Ministrisë së Turizmit, akuzohet për korrupsion, dënohet me kohën e paraburgimit 7 muaj, lihet i lirë më 19 shkurt 2007

23. Demir Lika, ish-kryetari i Komunës Golem, akuzohet për korrupsion, dënohet me 6 vjet burg e 3 milionë lekë gjobë më 12 dhjetor 2006

24. Adrian Shehu, ish-kryetari i Bashkisë së Sarandës, akuzohet për shpërdorim detyre, dënohet me 1 vit e gjysmë burg më 19 tetor 2007

25. Haxhi Musai, ish-shefi i urbanistikës në Bashkinë e Sarandës, akuzohet për shpërdorim detyre, dënohet me 3 vjet burg më 19 tetor 2007
G. Shqip
Shtuar më 06/11/2007, ora 00:01
Tage: arkiv
Shkruani komentin tuaj!
Të fundit nga kjo kategori