KOMENT/ Kush po e "vret" Saimir Tahirin?
Pëlqej
Saimir Tahiri sapo kishte filluar të rekuperonte figurën e tij pas shkarkimit të bujshëm në pranverën e këtij viti.

Në rrafshin e partisë, ai punoi fort me strukturat e PS-së në Tiranë duke ndikuar në një fitore të paster të socialistëve.

Sa i përket rrafshit personal, Tahiri punoi fort për të kultivuar figurën e një politikani popullor dhe të dashur, shkruan Albeu.com.

Në lidhje me këtë mund të sjellim ndërmend daljet publike më 14 mars i rrethuar nga dhjetra qytetarë në bulevardin qendror.

Gjithashtu, Tahiri kishte filluar të merrte pjesë nëpër emisione të njohura në televizionet më të mëdha në vend në tentativë për të rikthyer vetes shkëlqimin që iu hoq disi nga shkarkimi, por edhe në përgatitje për ndonjë sfidë të fortë politike në një periudhë afatmesme.

Pavarësisht akuzave për kanabizimin e vendit, Tahiri ia doli që të kultivonte figurën e një politikani të ri, energjik dhe i gatshëm për sfida të tjera.

Kapja e njërit prej vëllezërve Habilaj në Itali me 3.5 ton drogë si edhe furtuna që pasoi në Tiranë, ndër të tjera është edhe një aksion për "vrasjen" e tij në politikë, shkruan Albeu.com.

Aktualisht, Saimir Tahiri është në qendër të akuzave si nga opozita ashtu edhe nga segmente të caktuara të maxhorancës, të cilët duket se po u intereson që uragani i nisur të marrë fillimisht para ish-ministrin e Brendshëm.

Pse jo, kështu siç kanë nisur të zhvillohen gjëra, nuk është çudi që Saimir Tahiri për një arsye apo tjetër të jetë viktima e parë e Vettingut për të hapur më pas rrugën për "peshqit" më të vegjël, të cilët do të sakrifikohen për të shpëtuar "peshkaqenët". /albeu.com/
Shtuar më 17/10/2017, ora 15:00
Shkruani komentin tuaj!
Të fundit nga kjo kategori