Komandot e Oltës që vrasin me plumb në kokë
Nga Albeu.com
41 vjeçari Merviol Bilo është ndër shqiptarët më të kërkuar tani për vrasjen dhe plagosjet në Bllok pas një sherri, i cili deri më tani është servirur si çështje ngacmimi, por mbetet për t'u parë se cili ishte shkaku i vërtetë.

Bilo, baba i dy fëmijëve është pjestari forcave komando të Ushtrisë së Shqipërisë, por rroga qesharake me të cilën paguhen ushtarët duket se e ka detyruar që të bëjë edhe një punë të dytë si badigard i Elvana Gjatës, shkaku për të cilin ishte prezent natën e krimit në lokalin e njohur në Bllok ku edhe qëlloi si profesionist në kokë anëtarët e grupit të Ervis Martinajt.

Komandoja ka kryer një krim, i cili duhet të dënohet sipas ligjeve në fuqi, megjithatë nisur edhe nga profili i tij si ushtarak karriere i ushtrisë shqiptare dhe pjesëmarrës në disa misione të rrezikshme jashtë shtetit bën që të rikthehemi tek trajtimi mizerabël që i bëhet pjestarëve të njësive elitë të ushtrisë apo policisë shqiptare.

Kjo, sepse Bilo nuk është ushtaraku i vetëm i përfshirë në ngjarje kriminale.

Është bërë rrugë tashmë që në ngjarje të rënda kriminale të përfshihen pjestar apo ish-pjestar të forcave komando apo ish-policë, të cilët nuk ia dalin dot me pagat qesharake që u ofrohen.

Grabitjet e blindave të bankave në rrugën e Rinasit janë shembulli konkret, ndërsa nuk mund të lihen pa përmendur edhe dezertimi i pesë komandove një vit më parë në Angli, një skandal i publikuar për herë të parë nga Albeu.com.

Të nëpërkëmbur dhe keqpaguar, ushtarët më të stërvitur të këtij vendi vihen në kërkim të burimeve të tjera të të ardhurave duke shkaktuar edhe ngjarje si ajo e dy netëve më parë në Bllok, grabitjet në rrugën e Rinasit apo dezertimet nga ushtria për një jetë më të mirë në Angli. /albeu.com/
Shtuar më 06/10/2018, ora 18:06

Shkruani komentin tuaj!
Të fundit nga kjo kategori