KLD dërgon në MD raportin e inspektimit për gjyqtarin Lleshi
Zëvendëskryetari i Këshillit të Lartë të Drejtësisë, Elvis Çefa dorëzoi sot në Ministrinë e Drejtësisë raportin dhe dokumentacionin përkatës të inspektimit të veprimtarisë së gjyqtarit Shtjefën Lleshi, në Gjykatën e Rrethit Gjyqësor Pukë, për të gjykuar mundësinë eventuale mbi fillimin e procedimit disiplinor ndaj gjyqtarit në fjalë.

Referuar gjetjeve të dala pas këtij inspektimi të përbashkët të bërë nga inspektorati i Këshillit dhe inspektorati i Ministrisë së Drejtësisë, Zëvendëskryetari i KLD-së i kërkoi gjithashtu Ministrisë së Shëndetësisë, verifikimin e të dhënave mbi mjekët e familjes dhe mjekët e tjerë, të cilët kanë lëshuar akte të përdorura në këto procedime penale, duke i rekomanduar edhe zhvillimin e një inspektimi tematik mbi mjekët që lëshojnë akte për qëllime provuese në procese gjyqësore.

Cefa njoftoi gjithashtu Prokurorinë e Përgjithshme për rezultatin e këtij inspektimi, duke saktësuar se grupi i inspektimit e ka zhvilluar veprimtarinë e tij duke shmangur mbivendosjen me veprimtarinë hetimore të organit të akuzës për faktet që përbëjnë vepër penale. Është sugjeruar që konstatimet e këtij inspektimi të mbahen në konsideratë në procesin e hartimit të ndryshimeve ligjore eventuale të Kodit të Procedurës Penale, me qëllim uljen e hapësirave për abuzim. /albeu.com/
Shtuar më 23/01/2014, ora 18:15

Shkruani komentin tuaj!
Të fundit nga kjo kategori