Jeni vonë, Thaçi çfarë duhet t'i kërkojë pa kompromis Vuçiçit dhe BE-së
Pëlqej
Koment nga Ervin Shkulaku

Tashmë ka kohë që është bërë tollovi në Kosovë falë deklaratave të Presidentit Hashim Thaçi se do të kërkojë nga Serbia që të marrim Luginën e Preshevës me rrethinat e saj.

Madje aq tollovi e madhe po duket saqë edhe ndërkombëtarët përfshirë edhe Angela Merkel janë detyruar të japin deklarata për qorrsokakun ku jemi futur, daljen e të cilit e dinë vetëm Hashim Thaçi, Aleksandër Vuçiç dhe Federika Mogherini.

Edhe në Prishtinë kanë filluar zëra, jo jemi kundër Thaçit etj, që duket se janë zëra pa ndikim pasi shumica prej tyre gjithmonë e kanë mbështetur Thaçin në rrugëtimin e tij politik dhe në dialogun me Serbinë,shkruan albeu.com.

Të gjithve na kujtohet ajo ditë se si u zgjodh president nën gazin lotsjellës dhe protestave por me votën e LDK-së Thaçi doli triumfues edhe njëherë. Kurse sot LDK ra në opozitë e po përpiqet të luajë rolin e opozitarit duke e kundërshtuar. Të ishin kaq opozitë e kishin ndalur Ramush Haradinajn të zgjidhej kryeministër.

Kurse, Ramush Haradinaj i ka thënë ca fjalë se kufijtë ndryshohen me luftë dhe tashmë po merr diell nga bregdeti shqiptar duke treguar muskujt. Deklarata të forta Haradinaj jepte edhe për demarkacionin me Malin e Zi por tashmë edhe ajo çështje ka përfunduar.

Ndërkaq edhe Albin Kurti duket se ka ndryshuar taktikë dhe protestat nuk po i bën në rrugë por në Facebook.

Prandaj këto zëra janë të dobët ta ndalin se fundja nëse do të ishin të shqetësuar se po bëhet pazar me troje do të ishin çuar me kohë në protestë për ta kundërshtuar.

Gjithsesi të këthehemi te Hashim Thaçi, se fundja ky po i drejton të gjitha.

Ka diçka konkrete saqë po ndodh kjo, duket se është në plan për një marrëveshje me Serbinë.

Por, Thaçi ta ketë parasysh diçka, në çdo lloj marrëveshje me Serbinë duhet të jetë e qartë se Serbia, Kisha Ortodokse Serbe dhe Rusia duhet ta njohin pavarësinë e Kosovës dhe të mos ndërhyjnë më për asgjë. Kosova si një shtet i pavarur të ketë të drejtën absolute të marrë vendime si të dëshirojë.

Të mos gëzohen me një ulëse ne OKB se asgjë nuk është. Madje Trump po e sulmon aq shumë OKB-në saqë ia ka ulur vlerën.

Nëse, Serbia nuk e njeh Kosovën, s'ka normalitet. Gjithmonë do të kërkojnë diçka dhe me këto kushte fatkeqësisht gjithmonë po e marrin.

Prandaj, Thaçi t'ja bëjë të qartë Mogherinit e BE-së: Serbia të na njohë pavarësinë e plotë dhe ta kuptojë se Kosova nuk është më e Serbisë.

Gjithashtu Thaçi duhet të mbështetet fillimisht te SHBA pastaj te BE, pasi SHBA është një shtet ndërsa BE është shumë shtete. E pamë shumë mirë si dy shtete të BE-së për interesa të tyre shkelën vendimin e Komisionit Evropian dhe nuk i dhanë Shqipërisë hapjen e negociatave. Pra, në BE janë 28 zëra që duhet tu mbushësh mendjen kurse SHBA është një me Donald Trump në krye. Gjithashtu shpresojmë që përplasjet e Trump me Merkel të mos ndikojnë te dialogu Kosovë-Serbi.

E tashmë si gjithmonë të gjithë të bëjmë sehir duke shikuar Hashim Thaçin se çfarë marrëveshje të dhimbshme do të na sjellë këtë herë. Jemi kuriozë edhe për Asociacionin që duket se është skandaloz dhe reagimin e Haradinajt. A do t'i mbyllë sytë para tij?/albeu.com/



Shtuar më 16/08/2018, ora 19:07
Shkruani komentin tuaj!
Të fundit nga kjo kategori